पोलादपूरमधील अपार्टमेंटसबाबत गौडबंगाल उघडकीस येणार?
पोलादपूर | शैलेश पालकर |
शहरामध्ये गेल्या आठ दहा वर्षांपासून विविध अपार्टमेंटसच्या उभारणीपासून सुरू झालेल्या अनेक लोकचर्चेतून व्यक्त होणाऱ्या हालचालींनंतर अद्याप कोणीही पोलीस ठाण्याचा दरवाजा ठोठावण्यापर्यंत गेले नसल्याने झाकून राहिलेलं गौडबंगाल समृध्दी अपार्टमेंटविरूध्द पोलादपूर पोलीस ठाण्यात गुन्हा दाखल झाल्याने उघडकीस येण्याची चिन्हे दिसून येत आहेत. उमरठ येथील फिर्यादीने याप्रकरणी झालेल्या 8.45 लाखांच्या आर्थिक व्यवहारातील फसवणुकीबाबत पोलादपूर पोलीस ठाण्यात तक्रार दिल्याने तपासाची चक्रे वेगाने फिरण्याची चिन्हे दिसून येत आहेत.
उमरठ येथील फिर्यादी कैलास दत्ताराम पार्टे यांनी समृध्दी अपार्टमेंटमध्ये सी विंग सदनिका क्रमांक 107 क्षेत्र 380 चौरसफूट हे 2300 रूपये प्रतिचौरस फुट दराने खरेदी करण्याचे ठरले. त्यानंतर 460 चौरसफूट क्षेत्र 1900 रूपये दराने खरेदी करण्याचे ठरले. सी विंग मधील सदनिका क्रमांक 107 आणि सध्याची बी विंगमधील सदनिका क्रमांक 107 ही खरेदी करण्यासंदर्भात व्यवहार झाला असताना ती अद्याप फिर्यादी यांच्या नावे न करता अपर्णा देहू मोरे (रा.ठाणे)यांच्या नांवे साठेखत करून फिर्यादी यांची फसवणूक करण्यात आली. याबाबत फिर्यादी यांना कोणत्याही प्रकारची पूर्वकल्पना दिली नव्हती अथवा त्यांची पूर्वपरवानगी घेतली नव्हती, असे तक्रारअर्जात नमूद करण्यात आले आहे. यासंदर्भातील आर्थिक व्यवहार 17 ऑगस्ट 2014 ते 29 नोव्हेंबर 2017 रोजी पोलादपूर पंचायत समितीच्या बाजूला पोलादपूर शहरामधील समृध्दी अपार्टमेंट येथे झाला. याबाबत समृध्दी रिअल्टर्स ऍण्ड डेव्हलपर्सचे बिल्डर तृषाण गणपत कदम आणि प्रियांका तृषाण कदम यांच्याकडे फिर्यादी कैलास दत्ताराम पार्टे रा.उमरठ, पो.साखर.ता.पोलादपूर यांनी वारंवार सदनिका आणि दिलेल्या रकमेबाबत वारंवार चौकशी केली असता त्यांनी उडवाउडवीची उत्तरे दिल्याने फिर्यादी यांनी गुरूवार, दि. 16 सप्टेंबर 2021 रोजी सायंकाळी 4.50 वाजता पोलादपूर पोलीस ठाण्यात येऊन तक्रार दाखल केली. याप्रकरणी पोलादपूर पोलीस ठाण्याचे सहायक पोलीस निरिक्षक प्रशांत जाधव यांच्या मार्गदर्शनाखाली पोलीस हवालदार संदीप शिरगांवकर अधिक तपास करीत आहेत.
गेल्या काही वर्षांपासून समृध्दी रिअल्टर्स ऍण्ड डेव्हलपर्सच्या समृध्दी अपार्टमेंट या इमारतीमधील सदनिकाधारकांच्या खरेदी व्यवहारासंदर्भात तसेच एकूणच सामायिक जमीन, एफएसआय क्षेत्र, बुकींग व सदनिका खरेदी, विद्युतपुरवठा, घरनंबर व मालमत्ताआकारणी, सोसायटी स्थापनेबाबतच्या अडचणी, ताबा देण्यासंदर्भातील अडचणी, एकच सदनिका अनेकांना विक्री करणे, एजन्टसद्वारे केली गेलेली फसवणूक तसेच अन्य अनेक विषयांबाबत पोलादपूर शहर आणि तालुक्यामध्ये जोरदार चर्चा सुरू होती. मात्र, प्रत्येकवेळी तक्रारदार आज पोलीस ठाण्यात जाईल, उद्या जाईल, अशी शक्यता असताना तक्रार केली जात नसे. कधी पोलीस ठाण्यातून तक्रारदारांना दिवाणी प्रकरण असल्याचे सांगून परस्पर कोर्टात जाण्याचा सल्ला दिला जात होता तर कधी तक्रारदारांना तडजोडीतून तक्रार करण्यापासून परावृत्त केले जात होते. मात्र, आता या सर्व बाबींवर प्रकाशझोत पडण्याची चिन्हे दिसून येत असून उमरठ येथील फिर्यादी कैलास दत्ताराम पार्टे यांनी दिलेल्या तक्रारीवरून पोलादपूर पोलीस ठाण्यात 34-2021 गुन्हा र.नं.नुसार भा.दं.वि. 420,406 व 34 कलमान्वये बिल्डर्स तृषाण गणपत कदम आणि प्रियांका तृषाण कदम (आरोपींचा पत्ता माहिती नाही) यांच्याविरूध्द गुन्हा दाखल करण्यात आला आहे.
पोलादपूर शहरातील अनेक अपार्टमेंटच्या उभारणीतील त्रुटी व दोषांसंदर्भातील प्रकरणांची चर्चादेखील पोलादपूर शहरामध्ये होत असून भविष्यात त्या काही अपार्टमेंटसमधील सदनिकाधारकांकडून पोलीस ठाण्याचा दरवाजा ठोठावला जाण्याची चिन्हे दिसून येत आहेत.