श्रीवर्धनला वाहनतळाची प्रतीक्षा

मठाचा गवंड, शासकीय विश्रामगृह मार्गावर वाहतूक कोंडी

| श्रीवर्धन | प्रतिनिधी |

पर्यटनस्थळ म्हणून प्रसिद्ध असलेल्या श्रीवर्धन शहरात मोठ्या संख्येने पर्यटक दाखल होत असताना, नगरपरिषदेचे वाहनतळ नसल्याने वाहतूक व्यवस्थेचा प्रश्न गंभीर बनत आहे. शहरात येणारे पर्यटक वाहनतळाची सुविधा उपलब्ध नसल्यामुळे समुद्रकिनाऱ्यालगत मिळेल त्या मोकळ्या जागेत आपली वाहने उभी करीत आहेत. परिणामी मठाचा गवंड आणि शासकीय विश्रामगृह मार्गावर वारंवार वाहतूक कोंडी होत असून स्थानिक नागरिकांसह पर्यटकांनाही याचा त्रास सहन करावा लागत आहे.

श्रीवर्धन शहर पर्यटनाच्या दृष्टीने आधुनिकतेकडे वाटचाल करीत असताना मूलभूत सुविधांपैकी महत्त्वाची असलेली वाहनतळाची सुविधा मात्र अद्याप उपलब्ध झालेली नाही. विशेषतः पर्यटन हंगामात वाहनांची संख्या वाढल्याने रस्त्याच्या कडेला अस्ताव्यस्त पद्धतीने वाहने उभी केली जातात. त्यामुळे वाहतुकीला अडथळा निर्माण होण्याबरोबरच रस्त्यावरून ये-जा करणाऱ्या वाहनचालकांना मोठी कसरत करावी लागते.

नगरपरिषदेने शहराच्या भविष्यातील वाढत्या पर्यटनाचा विचार करून सुसज्ज व नियोजनबद्ध वाहनतळ उभारण्याचा निर्णय तातडीने घ्यावा, अशी मागणी नागरिक व पर्यटकांकडून होत आहे. वाहनतळासाठी योग्य जागेची निवड करून आवश्यक नियोजन, पार्किंग व्यवस्था आणि वाहतूक नियंत्रणाची सुविधा उपलब्ध करून देणे गरजेचे आहे.

“श्रीवर्धन आधुनिक पर्यटनस्थळ म्हणून विकसित होत असताना वाहनतळासारखी मूलभूत सुविधा उपलब्ध नसणे ही गंभीर बाब आहे. नगरपरिषदेने याबाबत लवकरात लवकर ठोस निर्णय घेऊन वाहनतळाची सुविधा उपलब्ध करून द्यावी,” अशी मागणी नागरिकांकडून होत आहे.