महसूल विभागातील लाचखोरांवर कारवाई

कोप्रोली मंडळ अधिकारी, चिरनेर तलाठीसह कोतवालला अटक; उरणच्या महसूल विभागात खळबळ

| उरण | वार्ताहर |

सातबारा उताऱ्यावर वारस नोंद करण्याच्या मोबदल्यात एक लाख रुपयांची लाच मागितल्याच्या आरोपावरून नवी मुंबई लाचलुचपत प्रतिबंधक विभागाने उरण तालुक्यात मोठी कारवाई केली. कोप्रोली मंडळ अधिकारी के. डी. मोहिते, चिरनेर तलाठी जयहिंद कोळी आणि कोतवाल नथुराम कातकरी यांच्याविरोधात ही कारवाई करण्यात आल्याची माहिती समोर आली आहे. मंगळवारी (दि.6) झालेल्या या कारवाईमुळे महसूल विभागात मोठी खळबळ उडाली आहे.

चिरनेर येथील एका शेतकऱ्याने सातबारा उताऱ्यावर वारस नोंद करण्यासाठी संबंधितांकडून एक लाख रुपयांच्या लाचेची मागणी होत असल्याची तक्रार नवी मुंबई लाचलुचपत विभागाकडे केली होती. तक्रारीची पडताळणी केल्यानंतर पथकाने चिरनेर येथील तलाठी कार्यालयात सापळा रचला. नवी मुंबई लाचलुचपत विभागाचे उपअधीक्षक धर्मराज सोनके यांच्या मार्गदर्शनाखाली ही कारवाई करण्यात आली. लाचेची रक्कम स्वीकारण्याच्या कारवाईदरम्यान संबंधितांना पथकाने ताब्यात घेतले. त्यानंतर त्यांना उरण पोलीस ठाण्यात नेण्यात आले असून, पुढील कायदेशीर प्रक्रिया सुरू आहे. दरम्यान, या प्रकरणामुळे महसूल विभागातील कामकाजावर पुन्हा प्रश्नचिन्ह निर्माण झाले आहे. संबंधित अधिकाऱ्यांच्या पूर्वीच्या कार्यकाळातील कामकाजाचीही चौकशी करण्याची मागणी स्थानिक पातळीवर होत आहे. के. डी. मोहिते यांनी 2023-24 मध्ये सजा चिरनेर तलाठी कार्यालयाचा कारभार पाहिल्याचा दावा करण्यात येत असून, त्यांच्या त्या काळातील पदस्थापना, कार्यक्षेत्र आणि कामकाजाच्या नोंदी तपासण्याची मागणी होत आहे. सातबारा, फेरफार आणि वारस नोंदीसारख्या कामांसाठी शेतकऱ्यांना महसूल कार्यालयात वारंवार हेलपाटे मारावे लागतात. अशा प्रकरणांत लाचेची मागणी होत असल्यास त्यावर कठोर कारवाई होणे आवश्यक आहे. या कारवाईमुळे उरण तालुक्यातील महसूल यंत्रणेच्या कारभाराची सखोल तपासणी करण्याची मागणी जोर धरू लागली आहे.