सॅटेलाइट फोनची सेवा अद्याप बंदच

सेवा कुचकामी ठरल्याने संतापाची लाट; मच्छीमारांचे सव्वा लाख रुपये वाया?

| चिरनेर | प्रतिनिधी |

मुख्यमंत्री, मत्स्यव्यवसाय मंत्र्यांनी आपात्कालीन परिस्थितीत त्वरित संपर्क साधून बचाव करण्यासाठी मच्छीमारांना लाखो रुपये किंमतीचे सॅटेलाइट फोनचे वाटप करण्यात केले होते. परंतु, दोन महिने उलटून गेल्यानंतरही ही सेवा अद्यापही सुरू झालेली नाही. त्यामुळे सरकारची सॅटेलाइट फोनची सेवा कुचकामी ठरल्याने मच्छीमारांमध्ये संतापाची लाट उसळली आहे.

राज्यातील मच्छीमारांना खोल समुद्रात मासेमारी करताना कोणत्याही परिस्थितीत किनाऱ्याशी संपर्क साधता यावा, आपत्कालीन प्रसंगी तत्काळ मदत मिळावी आणि हवामान तसेच सुरक्षा सूचना वेळेवर प्राप्त व्हाव्यात, यासाठी महाराष्ट्र सरकारने सॅटेलाइट फोन योजना आणली आहे. राज्याच्या मच्छीमारांसाठी “सुरक्षा प्रथम” या धोरणानुसार आधुनिक तंत्रज्ञानाचा वापर वाढविण्यावर भर देण्यात येत आहे. त्यासाठी मत्स्यव्यवसाय विभागाने बीएसएनएल अधिकाऱ्यांशी सेवा देण्याबाबत चर्चा करूनच बीएसएनएल ग्लोबल सॅटेलाईट फोन सेवा सुरू करण्यात येणार असल्याचे मत्स्यव्यवसाय मंत्री नितेश राणे यांनी सांगितले होते. त्यानंतर प्रायोगिक तत्त्वावर काही मच्छीमारांना जुलै महिन्यात सॅटेलाईट फोनचे वाटपही करण्यात आले होते. त्यावेळी आपात्कालीन सॅटेलाईट फोनची सेवा दि.16 सप्टेंबरपासून कार्यान्वित होणार असल्याचेही मंत्र्यांनी स्पष्ट केले होते. त्यानंतर मच्छीमारांनी सव्वालाख रुपये किंमत असलेली सॅटेलाईट फोन सेवा उपलब्ध करून घेण्यासाठी कर्ज, उधारी, उसनवार करीत खरेदी केली. तसेच, मासिक 6 हजार रुपये खर्च करून रिचार्ज देखील मारला. मात्र, मच्छीमारांचे प्राण आणि उपजीविका सुरक्षित ठेवण्यासाठी शासनाने मोठा गाजावाजा करून सर्वोच्च प्राथमिकता देणारी मच्छीमारांसाठी जीवनदायी सॅटेलाईट फोन सेवाच सुरूच झालेली नाही. त्यामुळे मच्छीमारांमध्ये संतापाची लाट उसळली आहे.

जिल्ह्यातील 25 मच्छीमारांचा समावेश
मुख्यमंत्री, मत्स्यव्यवसाय मंत्र्यांनी आपात्कालीन परिस्थितीत त्वरित संपर्क साधून बचाव करण्यासाठी मच्छीमारांना सव्वालाख रुपये किंमतीचे सॅटेलाइट फोनचे वाटप करण्यात केले होते. त्यात रायगड जिल्ह्यातील एकूण 25 मच्छीमारांचा समावेश आहे. त्यापैकी 10 ते 12 करंजा-उरण येथील मच्छीमारही असल्याची माहिती संबंधित मच्छीमारांनी दिली आहे. मात्र, मागील दोन महिन्यांनंतरही सॅटेलाईट फोन सेवा सुरूच झाली नसल्याची माहिती करंजा येथील मच्छीमार रोहन नाखवा यांनी दिली आहे.

खोल समुद्रात मासेमारी करणाऱ्या मच्छीमारांसाठी आपात्कालीन परिस्थितीत बचावासाठी सुरू करण्यात आलेली सॅटेलाईट फोन सेवा कार्यान्वित झालेली नाही. याची माहिती घेतली जात आहे.

– महेश देवरे, सहआयुक्त,
मत्स्यव्यवसाय विभाग