उत्तर प्रदेश 

मागील आठवड्यात प्रदर्शित झालेल्या तानाजी - ‘द अनसंग वॉरियर’ या चित्रपटाने बॉक्स ऑफिसवर सिनेरसिकांची मने जिंकत सुपरडुपर हिटचा बोलबाला केला आहे. या पार्श्‍वभूमीवर उत्तर प्रदेशचे मुख्यमंत्री योगी आदित्यनाथ यांनी तानाजी चित्रपट करमुक्त करण्याचा निर्णय घेतला आहे. दरम्यान, सिनेअभिनेता अजय देवगण याला चित्रपट करमुक्त झाल्याने अधिक फायदा होणार असून, देवगणने ट्विटरच्या माध्यमातून यूपीचे मुख्यमंत्री योगी आदित्यनाथ यांचे आभार मानले आहेत.

‘तानाजी’ चित्रपट प्रदर्शित झाल्यापासून चित्रपटाने जबरदस्त कमाईचा उच्चांक गाठला आहे. तीन दिवसांतच चित्रपटाने तब्बल 61. 75 कोटी रुपयांची कमाई केली आहे. जर चित्रपट असाच पुढेही सुपरहिट होत राहिला, तर यावर्षीचा तानाजी हा चित्रपट पहिला ब्लॉकबस्टर असेल, असे तज्ज्ञ सांगतात. ‘यूपीत करमुक्त केलेला तानाजी चित्रपट तुम्हीही अवश्य बघा. मलाही आनंद वाटेल’, असे आवाहनही देवगणने सोशल मीडियावर योगी आदित्यनाथ यांना केले आहे.

या चित्रपटात अजय देवगण याने मुख्य भूमिका साकारली आहे. तसेच काजोल, शरद केळकर, सैफ अली खान हे कलाकार अन्य भूमिका साकारताना दिसतात. चित्रपटाचे दिग्दर्शन ओम राऊत यांनी केले आहे. याआधीही दीपिका पदुकोणचा ‘छपाक’ चित्रपट छत्तीसगड, मध्य प्रदेश आणि राजस्थानमध्ये करमुक्त करण्यात आला होता. तानाजी आणि छपाक हे दोन्ही चित्रपट 10 जानेवारीला प्रदर्शित झाले आहेत. या चित्रपटांचे सर्वच स्तरातून कौतुक केले जात आहे.

अवश्य वाचा