डॉ. सुहास माने यांना अटकपुर्व जामीन मंजुर

| अलिबाग | विशेष प्रतिनिधी |

पोलीस भरती प्रकरणात महिला उमेदवारांकडून खंडणी प्रकरणात रायगडचे जिल्हा शल्य चिकित्सक डॉक्टर सुहास माने यांनी आपली अटक टाळण्यासाठी अटकपुर्व जामीनासाठी न्यायालयात धाव घेतली असून त्यांना अटकपुर्व जामीन मंजुर झाल्याने दि. 25 पर्यंत त्यांना अटक करता येणार नाही. दरम्यान दि. 30 रोजी त्यांना पुन्हा एकदा चौकशीसाठी बोलवले जाणार असल्याने त्यांच्यासमोरील अडचणी कायम आहेत.

खंडणी प्रकरणात जिल्हा शल्यचिकित्सकांच्या लिपिकास अटक झाल्यानंतर जिल्हा रुग्णालयातील भ्रष्टाचार चव्हाट्यावर आला. या प्रकरणात जिल्हा शल्यचिकित्सक डॉ. सुहास माने यांची दोन तास चौकशी करण्यात आली. त्यांचा जबाब नोंदविण्यात आला आहे. तत्पूर्वीच सुहास माने यांनी आपली अटक टाळण्यासाठी अटकपुर्व जामीनासाठी अर्ज केला होता. त्यानुसार दि. 25 पर्यंत त्यांना अटकपुर्व जामीन मंजुर करण्यात आला आहे. रायगड पोलीस दलात भरतीत उत्तीर्ण झालेल्या उमेदवारांची जिल्हा रुग्णालयात वैद्यकीय तपासणी सुरू होती. ही तपासणी करताना 15 महिला उमेदवारांकडून प्रत्येकी 1500 रुपयांची रक्कम जिल्हा शल्यचिकित्सकांचे लिपिक प्रदीप ढोबळ याने वसूल केले. पैसे दिले नाहीत तर वैद्यकीय तपासणीत अपात्र ठरविण्याची धमकी देण्यात आली होती. या प्रकरणी अलिबाग पोलीस ठाण्यात गुन्हा दाखल झाल्यानंतर ढोबळ याला अटक करण्यात आली. या प्रकरणामुळे जिल्हा रुग्णालयातील भ्रष्टाचार चव्हाट्यावर आला. हे प्रकरण उघडकीय आल्यानंतर जिल्हा शल्यचिकीत्सक डॉ. सुहास माने तडकाफडकी रजेवर गेले होते. रजेवरून परत आल्यावर ते पोलीस चौकशीला सामोरे गेले.

दरम्यान, जिल्हा रुग्णालयातील जिल्हा शल्यचिकित्सकांच्या दालनातील सीसीटीव्ही फुटेजची पाहणी पोलिसांनी केली असता त्यांना लिपीक ढोबळ हा अँटी चेंबरमध्ये जात असताना दिसत असून त्यांनतर तो डॉ. माने यांच्यासोबत बोलताना देखील दिसत आहे. त्या अनुषंगाने पुढील तपास करण्यात येणार आहे.

ढोबल याच्या पोलिस कोठडीत वाढ
खंडणी प्रकरणात जिल्हा शल्यचिकित्सकांचा लिपिक प्रदीप ढोबल यास अटक झाल्यानंतर पोलिस कोठडीत ठेवण्यात आले होते. दरम्यान पोलिस कोठडीची मुदत संपल्यानंतर त्याला न्यायालयात हजर केले असता त्याच्या पोलिस कोठडीत एक दिवसाची वाढ करण्यात आली आहे.