। पुणे । वृत्तसंस्था ।
चार दिवसांचे बाळ ताम्हिणी घाटातील दरीत फेकून दिल्याच्या घटनेने पुण्यात खळबळ उडाली आहे. बाळाचा टॉवेल सापडला असून बाळाचा शोध सुरू आहे. शिवदुर्ग मित्र ही संस्था आणि एमएमआरसीसीचे कार्यकर्ते सकाळपासून बाळाचा शोध घेत आहेत.
मंगल सचिन चव्हाण (वय २७, रा. गोडांबेवाडी घोटावडे, मुळशी, पुणे) यांनी पौंड पोलीस ठाण्यात याबाबत तक्रार दिली आहे. त्यानुसार मंगल चव्हाण या ५ फेब्रुवारी रोजी इंडिका कारने रत्नागिरी जिल्ह्यातील खेड तालुक्यातील अंबडस गावी निघाल्या होत्या. त्यांची पहिली मुलगी सारीका आणि नुकतेच जन्मलेले चार दिवसांचे बाळ त्यांच्या सोबत होते. पहाटे पाच वाजण्याच्या सुमारास त्यांची कार ताम्हिणी घाटात असताना मंगल हिचा पती सचिन गंगाराम चव्हाण व त्याचे भाऊ संजय गंगाराम चव्हाण, नितीन गंगाराम चव्हाण, अजित गंगाराम चव्हाण हे तिथं पोहोचले. त्यांनी जबरदस्तीने इंडिका कार थांबवली आणि मंगलच्या कुशीतील चार दिवसांच्या बाळाला जबरदस्तीने घेतले. त्यानंतर त्याचा गळा आवळून त्याला दरीत टाकून दिले.
या तक्रारीची गंभीर दखल घेऊन पोलीस उपनिरीक्षक जाधव यांच्यासह हवालदार सकपाळ, होळकर व महिला पोलीस शिपाई कोलते हे खासगी वाहनाने अंबडस गावी गेले. सोबत तक्रारदार महिला व तिची मुलगी होती. खेड पोलीस ठाण्यात झाल्या प्रकाराची माहिती देऊन पोलिसांनी अंबडस येथून संजय गंगाराम चव्हाण, नितीन गंगाराम चव्हाण, अजित गंगाराम चव्हाण व सचिन गंगाराम चव्हाण यांना ताब्यात घेतले. त्याची लोटे दूरक्षेत्र येथे नेऊन चौकशी केली. त्यानंतर संशयावरून पोलिसांनी या चौघांनाही ताब्यात घेतले आहे. या प्रकरनाची अधिक चौकशी सुरू आहे.