तेलंगणातील क्रीडा संकुलात थरार रंगणार; रेखा सावंतकडे महाराष्ट्राची धुरा
| मुंबई | प्रतिनिधी |
72 व्या महिला राष्ट्रीय कबड्डी स्पर्धा दि.27 ते 30 जानेवारी या कालावधीत तेलंगणा येथील गच्ची बोवली बंदिस्त क्रीडा संकुलातात पार पडणार आहेत. त्यासाठी महाराष्ट्राचा संघ राज्य संघटनेचे प्रभारी अध्यक्ष गजानन कीर्तीकर यांच्या मान्यतेने व मार्गदर्शनाखाली जाहीर करण्यात आला. यावेळी पुणे ग्रामीणच्या रेखा सावंतकडे संघाच्या नेतृत्वाची धुरा, तर मुंबई उपनगर पश्चिमच्या कोमल देवकरकडे सहाय्यक नेतृत्व सोपविण्यात आले आहे.
मुंबई उपनगर कबड्डी असो. व स्वस्तिक क्रीडा मंडळ यांच्या संयुक्त विद्यमाने डोंबिवली पूर्व येथील सुवर्णा संतोष केणे गार्डन येथे महाराष्ट्र संघाचे सराव शिबीर प्रशिक्षिका मेघाली म्हसकर-कोरगावकर यांच्या मार्गदर्शना खाली सुरू आहे. या संघासोबत फिजिओ म्हणून सलोनी संकपाळ यांची, तर फिटनेस ट्रेनर म्हणून सायली नागवेकर हिची नियुक्ती करण्यात आली आहे. या संघाच्या निवडीत पारदर्शकता यावी म्हणून या निवडीचे थेट प्रक्षेपण करण्यात येऊन ते कबड्डी रसिकांना दाखविण्यात आले. या संघाची निवड मीनल पालांडे, वीणा शेलटकर व मेघाली कोरगावकर यांच्या निवड समितीने केली. या तिन्ही सदस्य शिवछत्रपती पुरस्कार खेळाडू आहेत. हा संघ सोमवारी (दि.26) पहाटे तपोवन एक्स्प्रेसने स्पर्धेकरिता रवाना होणार आहे.
निवडण्यात आलेला संघ
रेखा सावंत-संघनायिका (पुणे ग्रामीण), कोमल देवकर-उपसंघनायिका (मुंबई उपनगर पश्चिम), प्रतीक्षा तांडेल (मुंबई शहर पश्चिम), समृद्धी मोहिते, याशिका पुजारी (दोघी मुंबई उपनगर पूर्व), पौर्णिमा जेधे, साक्षी सावंत (दोघी मुंबई शहर पूर्व), ज्युली मिस्किटा, संजना भोईर (दोघी पालघर), समरिन बुरोंडकर (रत्नागिरी), गार्गी साखरे (सातारा), आम्रपाली गलांडे (पुणे शहर), निकिता पडवळ (पुणे ग्रामीण), माधुरी गवंडी-ठाणे शहर. राखीव खेळाडू : हर्षा शेट्टी, अंकिता चव्हाण (दोन्ही पुणे शहर), तसलिन बुरोंडकर (रत्नागिरी), प्रशिक्षिका: मेघाली म्हसकर.