भीषण अपघात! मुंबई-पुणे महामार्गावर कंटेनरची सहा वाहनांना धडक

एक ठार, पाच जखमी; दोघांची प्रकृती चिंताजनक

| खोपोली | वार्ताहर |

मुंबई-पुणे एक्सप्रेस वे वर सोमवारी रात्रीच्या दरम्यान एका कंटेनरचा भरधाव वेगात असताना ब्रेक निकामे झाल्याने या कंटेनर चालकाचा गाडीवरील ताबा सुटल्याने त्याची सहा वाहनांना जबर धडक बसून विचित्र अपघात घडला. या अपघातात एकाचा उपचारादरम्यान मृत्यू झाला असून पाचजण जखमी झाले आहेत. त्यातील दोघांची प्रकृती चिंताजनक असल्याचे वृत्त आहे.

सोमवारी (दि.22) रात्री 11.15 च्या सुमारास एका कंटेनरचा ब्रेक निकामी झाला आणि त्यान इको, क्रेटा, टाटा जेस्ट कार, हुंडाई कार, किया कार आणि स्विफ्ट कार या वाहनांना धडक दिली. कंटेनरची धडक एवढी जबरदस्त होती की धडक दिलेल्या वाहनातील प्रवाशांना गंभीर स्वरूपाच्या जखमा झाल्या. अपघात झाल्याचे समजताच आयआरबी पेट्रोलिंग, देवदूत यंत्रणा, बोरघाट वाहतूक पॉलिसी यंत्रणा, डेल्टा फोर्स, महाराष्ट्र सुरक्षा बल, आरटीओ, लोकमान्य ॲम्बुलन्स यंत्रणा आणि अपघातग्रस्तांच्या मदतीसाठी सामाजिक संस्थेची टीम घटनास्थळी पोचली. सर्व जखमींना खोपोली नगरपालिका हॉस्पिटलमध्ये दाखल केले गेले. तेथे प्राथमिक उपचार करून जखमींना एमजीएम रुग्णालय पनवेल येथे पाठविण्यात आले. यात एकाचा हात तुटल्याने जास्त रक्तस्त्राव झाल्याने सुभाष पंढरीनाथ चौगुले (45) रा. वाशी, नवी मुंबई हे उपचारासाठी नेताना मृत्यूमुखी पडले. चंद्रकला सुभाष चौगुले रा. वाशी, अमितकुमार श्रीहरिराम थठेर रा. भांडुप, कौसर अली शाह रा. भांडुप, आफताब समीउल्ला आलम रा. भांडुप, अफसर अली मोहम्मद अली रा. वडाळा हे जखमी आहेत. यांना पनवेल येथे एमजीएम रुग्णालयात दाखल केले आहे. यातील दोन जणांची प्रकृती खालावल्याने त्यांच्यावर अतिदक्षता विभागात उपचार सुरू आहेत.

अपघाताच्या ठिकाणाहून पळून जात असताना बोरघाट वाहतूक पोलीस यंत्रणेने पोलीस उपनिरीक्षक योगेश भोसले यांच्या मार्गदर्शनाखाली पाठलाग करून कंटेनर अडवून चालकाला ताब्यात घेतले. अपघात खोपोली पोलीस स्टेशनच्या हद्दीत झाल्याने स.पो.नि. हरेश काळसेकर, आलोक खीसमतराव यांनी आपल्या कर्मचारी वर्गासह पोहचून घटनेची चौकशी सुरू केली. अपघात घडल्यानंतर सर्व सुरक्षा यंत्रणांनी तातडीने उपाययोजना अवलंबत बाधित वाहने बाजूला घेऊन वाहतूक सुरळीत केली. या अपघाताची दखल घेऊन खालापूर तालुक्याचे तहसीलदार आयुब तांबोळी आणि उपविभागीय पोलीस अधिकारी संजय शुक्ला यांनी गंभीर दखल घेतली असून त्यांनी रात्री उशिरापर्यंत मदत कार्याचा आढावा घेतला. खोपोली नगरपालिका रुग्णालयातील आरोग्य कर्मचाऱ्यांना सतर्क करून योग्य उपचार देण्यासाठी खोपोलीचे मुख्याधिकारी अनुप दुरे यांनी निर्देश दिले होते. त्यामुळे प्राथमिक उपचार तातडीने होऊन जखमींना पुढील उपचारासाठी रवाना करण्यात मदत झाली.