अलिबाग बार असोसिएशनच्या अध्यक्षपदी सुरेंद्र जोशी

ॲड. मानसी म्हात्रे महिला उपाध्यक्षपदी बिनविरोध

| रायगड | जिल्हा प्रतिनिधी |

रायगड जिल्हा आणि अलिबाग बार असोसिएशनच्या निवडणुकीत अध्यक्षपदी ॲड. सुरेंद्र जोशी बहुमताने विजयी झाले, तर महिला उपाध्यक्षपदी ॲड. मानसी म्हात्रे यांची बिनविरोध निवड झाली. या निवडीबद्दल त्यांचे सर्व स्तरांतून अभिनंदन होत आहे.

रायगड जिल्हा आणि अलिबाग बार असोसिएशनची निवडणूक शुक्रवार, दि. 9 ऑक्टोबर रोजी पार पडली. या निवडणुकीत अध्यक्षपदी ॲड. सुरेंद्र जोशी, उपाध्यक्षपदी ॲड. अनंत पाटील, सचिवपदी ॲड. राजेंद्र माळी, सहसचिवपदी ॲड. वैशाली बंगेरा, खजिनदारपदी ॲड. पुष्कर मोकल, हिशोब तपासणीसपदी ॲड. विनोद माळी, तर सदस्यपदी ॲड. हितेश पाटील, ॲड. अजहर घट्टे, ॲड. निवास पाटील, ॲड. मिलिंद साळवकर यांची निवड झाली. महिला सदस्यपदी ॲड. जयमाला पाटील, ॲड. सुलभा पाटील, ॲड. चैताली मगर आणि ॲड. अश्विनी म्हात्रे निवडून आल्या. या निवडणुकीत 522 वकिलांनी मतदानाचा हक्क बजावला.

अध्यक्षपदासाठी ॲड. सुरेंद्र जोशी आणि ॲड. जितेंद्र भगत यांच्यात लढत झाली. त्यात ॲड. जोशी यांनी बहुमत मिळवत विजय मिळवला. महिला उपाध्यक्षपदासाठी ॲड. मानसी म्हात्रे यांचा एकमेव अर्ज दाखल झाल्याने त्यांची बिनविरोध निवड झाली. उपाध्यक्षपदासाठी ॲड. अनंत पाटील आणि ॲड. दर्शन बैकर यांच्यात लढत झाली. त्यात ॲड. पाटील विजयी झाले. सचिवपदासाठी ॲड. राजेंद्र माळी आणि ॲड. निकेत चवरकर यांच्यात झालेल्या लढतीत ॲड. माळी यांनी बाजी मारली. महिला सहसचिवपदासाठी ॲड. वैशाली बंगेरा आणि ॲड. पल्लवी तुळपुळे यांच्यात लढत झाली. त्यात ॲड. बंगेरा विजयी झाल्या. हिशोब तपासणीसपदासाठी ॲड. सचिन मकाणी आणि ॲड. विनोद माळी यांच्यात लढत झाली. त्यात ॲड. माळी निवडून आले.

ॲड. मानसी म्हात्रे या अलिबागच्या उपनगराध्यक्षा असून शेकापच्या राज्य महिला आघाडीच्या प्रमुख आहेत. राजकीय आणि सामाजिक क्षेत्रात त्यांचे मोलाचे योगदान आहे. वकील म्हणून त्यांनी सर्वसामान्यांचा आवाज बनत त्यांच्या प्रश्नांना न्याय मिळवून देण्यासाठी प्रामाणिक प्रयत्न केले आहेत. वकिलांच्या प्रश्नांचा पाठपुरावा करून ते मार्गी लावण्यासाठीही त्या सातत्याने प्रयत्नशील राहिल्या आहेत. त्यांच्या निवडीबद्दल सर्व स्तरांतून अभिनंदनाचा वर्षाव होत आहे.