ताम्हिणी घाटात बस कारचा अपघात; 27 जण जखमी

। माणगाव । प्रतिनिधी ।

ताम्हिणी घाटात एका खासगी बसला भीषण अपघात झाला आहे. शुक्रवारी (दि. 2) दुपारी ही घटना घडली. एका तीव्र वळणावर हा अपघात झाला. यावेळी खासगी बसने एका कारला देखील धडक दिली आहे. यामुळे ही कार रस्ता ओलांडून झाडीत अडकून बसली. या अपघातात 27 प्रवासी जखमी झाले असून, यातील आठ ते दहा प्रवासी गंभीर जखमी झाले आहेत.

मिळालेल्या माहितीनुसार, ही बस आज सकाळी साडे अकराच्या सुमारास पुण्यातील भोसरी परिसरातून निघाली होती. बसमध्ये भोसरी येथील सावन आयबी ऑटो प्रा. लिमिटेड कंपनीचे 50 कर्मचारी होते. हे सर्वजण काशिद बीचला फिरायला जात होते. दरम्यान, शुक्रवारी दुपारी ही खाजगी बस ताम्हीणी घाटात आली असता एका तीव्र वळणावर चालकाचं बसवरील नियंत्रण सुटलं. ही बस रस्त्यावरून खाली उतरली आणि बाजुच्या खडकाळ भागाला जाऊन धडकली. यावेळी या बसने एका कारला देखील उडवलं. ही अपघातग्रस्त कारही रस्ता ओलांडून एका झाडीत जाऊन अडकली. या अपघातात 27 प्रवासी जखमी झाले असून, 8 ते 10 जण गंभीर जखमी झाले आहेत. सर्व जखमींना उपचारसाठी माणगाव उपजिल्हा रुग्णालयला पाठवण्यात आले आहे.

हा अपघात ताम्हिणी घाटातील प्रसिद्ध ‘गारवा हॉटेल’ परिसरात झाला. तीव्र वळणावर चालकाचे नियंत्रण सुटल्याने बस रस्त्याच्या कडेला असलेल्या डोंगरावर जाऊन आदळली. बस दरीत कोसळली असती तर मोठा अनर्थ घडला असता, मात्र डोंगराला धडकल्यामुळे बस थांबली. या अपघाताची माहिती मिळताच माणगाव पोलीस प्रशासन आणि स्थानिक बचाव पथक घटनास्थळी दाखल झाले. स्थानिक नागरिकांच्या मदतीने बसमधील जखमी प्रवाशांना बाहेर काढण्यात आले. जखमींना तातडीने रुग्णवाहिकेतून माणगाव उपजिल्हा रुग्णालयात उपचारासाठी दाखल करण्यात आले आहे.