नवी मुंबई विमानतळाची मालवाहतुकीत भरारी

नऊ महिन्यांत 11,853 टन मालाची हाताळणी; हवाई वाहतूक व्यवस्थेची सज्जता

| पनवेल | प्रतिनिधी |

नवी मुंबई आंतरराष्ट्रीय विमानतळाने (एनएमआयए) व्यावसायिक कामकाजाच्या पहिल्या नऊ महिन्यांत मालवाहतुकीच्या क्षेत्रात उल्लेखनीय कामगिरी नोंदवली आहे. जानेवारी ते सप्टेंबर 2026 या कालावधीत विमानतळावरून एकूण 11 हजार 853 मेट्रिक टन मालाची हाताळणी करण्यात आली. यामध्ये आंतरराष्ट्रीय मालवाहतुकीचा वाटा 54.6 टक्के, तर देशांतर्गत मालवाहतुकीचा वाटा 45.4 टक्के, आहे. या कामगिरीमुळे जागतिक मालवाहतूक क्षेत्रातील नवी मुंबई विमानतळाचे महत्त्व अधोरेखित झाले आहे.

विमानतळावरील मालवाहतूक सेवांच्या वाढत्या क्षमतेचे चित्र 9 ऑक्टोबर रोजी स्पष्ट झाले. या दिवशी कॅथे कार्गो, चॅलेंज एअर, कतार एअरवेज, एअरलॉजिक, एएफकॉम, एमएनजी एअरलाइन्स, एएसएल एअरलाइन्स आणि ॲटलस एअर या आठ विमान कंपन्यांच्या समर्पित मालवाहू विमानांचे यशस्वी व्यवस्थापन करण्यात आले. एकाच दिवसात आठ मालवाहू विमानांची हाताळणी केल्याने टर्मिनलची कार्यक्षमता, विमानांच्या जलद आवागमनाची क्षमता आणि विमानतळावरील हवाई वाहतूक व्यवस्थेची सज्जता दिसून आली.

आंतरराष्ट्रीय मालवाहतुकीचा सर्वाधिक वाटा जानेवारी ते सप्टेंबर 2026 या नऊ महिन्यांत विमानतळावर 6 हजार 477 मेट्रिक टन आंतरराष्ट्रीय मालाची हाताळणी झाली. यामध्ये 3 हजार 746 मेट्रिक टन आयात माल, तर 2 हजार 731 मेट्रिक टन निर्यात मालाचा समावेश आहे. याच कालावधीत देशांतर्गत मालवाहतुकीचे प्रमाण 5 हजार 376 मेट्रिक टन इतके होते. त्यात 1 हजार 528 मेट्रिक टन आयात आणि 3 हजार 848 मेट्रिक टन निर्यात मालाची नोंद झाली. एकूण मालवाहतुकीपैकी 6 हजार 579 मेट्रिक टन माल निर्यात स्वरूपाचा, तर 5 हजार 274 मेट्रिक टन माल आयात स्वरूपाचा होता. निर्यात मालाचे प्रमाण अधिक असल्याने विमानतळाची निर्यात वाहतुकीतील भूमिका महत्त्वाची ठरत आहे.

ऑगस्ट 2026 पासून मालवाहू विमानांच्या हालचालींमध्ये वेगाने वाढ झाली आहे. जागतिक मालवाहतूक सेवा सुरू झाल्यानंतर अवघ्या दोन महिन्यांच्या आत विमानतळावर 285 कार्गो एअर ट्रॅफिक मूव्हमेंट्स (एटीएम) नोंदवण्यात आल्याची माहिती देण्यात आली आहे. या काळात नियोजित आणि चार्टर सेवांच्या माध्यमातून 24 आंतरराष्ट्रीय मालवाहू विमानांचे व्यवस्थापन करण्यात आले.

जागतिक विमान कंपन्यांच्या सेवांचा विस्तारनवी मुंबई विमानतळावरील आधुनिक पायाभूत सुविधा आणि मालवाहतूक हाताळण्याची क्षमता यांमुळे आंतरराष्ट्रीय विमान कंपन्यांचा सहभाग वाढत आहे. बोईंग 777 एफ, बोईंग 747-8एफ यांसारख्या मोठ्या मालवाहू विमानांसोबतच अँटोनॉव्ह एएन-124 या अवजड मालवाहू विमानाचे व्यवस्थापन करण्याची क्षमताही विमानतळाने प्रदर्शित केली आहे.

औषधे आणि नाशवंत वस्तूंसाठी विशेष सुविधा
विमानतळाच्या मालवाहतूक टर्मिनलमध्ये विविध प्रकारच्या मालाची सुरक्षित आणि कार्यक्षम हाताळणी करण्यासाठी विशेष व्यवस्था करण्यात आली आहे. तापमान-संवेदनशील औषधे, नाशवंत कृषी उत्पादने, मौल्यवान वस्तू, इलेक्ट्रॉनिक उपकरणे आणि मोठ्या आकाराच्या औद्योगिक मालासाठी स्वतंत्र सुविधा उपलब्ध आहेत.

मालवाहतूक विस्तारण्यास मदत
डीएचएल एव्हिएशन, इंडिगो, एअर इंडिया एक्स्प्रेस, टर्किश एअरलाइन्स, सिचुआन एअरलाइन्स आणि एसएफ एअरलाइन्स या कंपन्यांचाही मालवाहतूक सेवांमध्ये सहभाग आहे. या कंपन्यांच्या माध्यमातून विमानतळाची देशांतर्गत आणि आंतरराष्ट्रीय मालवाहतूक जोडणी विस्तारण्यास मदत होत आहे.