मुरूड-अलिबाग रस्त्यावरील अपघात प्रकरण

ठेकेदार कंपनीविरुद्ध गुन्हा दाखल

| आगरदांडा | प्रतिनिधी |

मुरूड-साळाव या सुमारे 32 किलोमीटर लांबीच्या रस्त्याच्या काँक्रिटीकरणाच्या कामादरम्यान सुरक्षेच्या आवश्यक सूचना न लावल्यामुळे झालेल्या अपघातप्रकरणी संबंधित ठेकेदार कंपन्यांविरुद्ध मुरूड पोलीस ठाण्यात गुन्हा दाखल करण्यात आला आहे.

मुरूड-साळाव रस्त्याचे काम टरमॅट लिमिटेड आणि वराह इन्फ्रा लिमिटेड या कंपन्यांना देण्यात आले आहे. मात्र, रस्त्याचे काम सुरू असताना धोक्याची सूचना देणारे फलक, बॅनर, बॅरिकेड्स किंवा टेपिंग पट्टी यांसारख्या सुरक्षात्मक व्यवस्था न लावल्याचा आरोप करण्यात आला आहे. कंपनीच्या निष्काळजीपणामुळेच हा अपघात घडल्याचे प्राथमिक तपासात समोर आले आहे. 6 मार्च 2026 रोजी रात्री सुमारे 9.30 वाजण्याच्या सुमारास वनरक्षक सूरज सुहास सारंगे (31) रा. सर्वे, ता. मुरूड आणि त्यांचा मित्र सचिन चंद्रकांत सुर्वे हे मोटारसायकल वरून काशिदहून सर्वे गावकडे जात होते. अलिबाग-मुरूड मार्गावरील सर्वे गावाच्या हद्दीत ‌‘सह्याद्री टुरिस्ट होम’समोर खोदलेल्या खड्ड्यात त्यांची मोटारसायकल पडल्याने दोघेही गंभीर जखमी झाले.

या अपघातात सूरज सारंगे यांच्या डोक्याला गंभीर दुखापत झाली. त्यांना तातडीने अलिबाग येथील सिव्हिल रुग्णालयात उपचारासाठी दाखल करण्यात आले. मात्र, उपचारादरम्यान त्यांचा मृत्यू झाला. तर सचिन सुर्वे यांनाही किरकोळ दुखापती झाल्या आहेत. याप्रकरणी टरमॅट लिमिटेड व वराह इन्फ्रा लिमिटेड कंपनीच्या ठेकेदाराविरुद्ध मुरूड पोलीस ठाण्यात गुन्हा नोंदविण्यात आला आहे. या प्रकरणाचा पुढील तपास पोलीस निरीक्षक परशुराम कांबळे यांच्या मार्गदर्शनाखाली सहाय्यक फौजदार जनार्दन गदमले करत आहेत. दरम्यान, अलिबाग-मुरूड मार्गाच्या रुंदीकरणाचे काम सुरू असल्याने वाहनचालकांनी सावधगिरी बाळगून वाहन चालवावे, तसेच रस्त्याच्या परिस्थितीकडे लक्ष देण्याचे आवाहन रायगड पोलीस अधीक्षक कार्यालयाच्या जनसंपर्क विभागाकडून करण्यात आले आहे.