दहावी, बारावीचा निकाल 6 जूनपूर्वी?

| मुंबई | प्रतिनिधी |

महाराष्ट्र राज्य माध्यमिक आणि उच्च माध्यमिक शिक्षण मंडळाच्या दहावी आणि बारावीच्या परीक्षांचा निकाल कधी लागणार याबाबत सर्वांनाच उत्सुकता लागली आहे. त्यानुसार (दि.25) मे पर्यंत बारावीचा, तर दहावीचा निकाल (दि.6) जूनपूर्वी जाहीर होईल, अशी माहिती बोर्डाच्या वरिष्ठ अधिकार्‍यांनी खासगी वृत्तवाहिनीला दिली आहे. तसंच, जे विद्यार्थी परीक्षा अनुत्तीर्ण झाले आहेत, त्यांची पुरवणी परीक्षा जुलैमध्ये होणार असल्याचे सांगण्यात आले. दरम्यान, निकाल जाहीर झाल्यानंतर विद्यार्थ्यांना महाराष्ट्र बोर्डाची अधिकृत वेबसाइट mahasscboard.in आणि mahresult.nic.in वर निकाल पाहता येणार आहे. यंदा बारावीची परीक्षा (दि.21) फेब्रुवारीपासून, तर दहावीची परीक्षा (दि.1) मार्चपासून सुरू झाली होती. बारावीसाठी एकूण 14 लाख 25 हजार विद्यार्थ्यांनी अर्ज भरले होते. तर दहावी आणि बारावीचे मिळून एकूण 31 लाख विद्यार्थ्यांनी यंदा परीक्षा दिली आहे. त्यामुळे यंदाचा निकाल कसा लागतो? याकडे पालकांचे लक्ष लागले आहे.