डिसेंबरमध्ये 44 लाख लिटर दारु रिचवली

तळीरामांना बिअरची सर्वाधिक भुरळ; वाइनच्या विक्रीत प्रचंड घट

| रायगड | प्रमोद जाधव |

रायगड जिल्ह्यात डिसेंबर महिन्यात मद्यविक्रीने उच्चांक गाठला असून, तब्बल 43 लाख 27 हजार 525 बल्क लीटर दारू तळीरामांनी रिचवली आहे. यामध्ये बिअरची विक्री सर्वाधिक झाल्याचे राज्य उत्पादन शुल्क रायगड विभागाच्या आकडेवारीतून स्पष्ट झाले आहे. देशी व विदेशी दारुपेक्षा बिअरला मद्यपींची मोठी पसंती मिळाल्याने वाईनच्या विक्रीत मात्र लक्षणीय घट नोंदवली गेली आहे.

डिसेंबरमध्ये नाताळसह थर्टी फर्स्ट साजरा करण्यासाठी रायगड जिल्ह्यात मोठ्या प्रमाणात पर्यटक दाखल झाले होते. त्यामुळे हॉटेल, रेस्टॉरंट, कॉटेज पर्यटकांनी फुल्ल होते. दहा लाखाहून अधिक पर्यटकांनी या कालावधीत जिल्ह्याला भेट दिल्याने मद्यविक्रीत प्रचंड वाढ झाली. अनेक ठिकाणी पार्ट्यांचे आयोजन करण्यात आले होते, त्यासाठी राज्य उत्पादन शुल्क विभागाकडून मद्यविक्रीचे परवानेही देण्यात आले होते.

आकडेवारीनुसार, डिसेंबर महिन्यात 43 लाख 27 हजार 525 बल्क लीटर इतकी दारु मद्यपींनी रिचवली असल्याची माहिती समोर आली आहे. त्यामध्ये 9 लाख 51 हजार 381 बल्क लीटर देशी दारु, 9 लाख 14 हजार 426 बल्क लीटर विदेशी दारु, 24 लाख 96 हजार 960 बल्क लीटर बिअर आणि 64 हजार 758 वाईन विकली गेली. यावरुन बिअरची क्रेझ किती वाढली आहे, हे स्पष्ट होते.

विदेशी दारुच्या किमतीमध्ये तीस टक्क्यांपेक्षा जास्त वाढ झाल्याने मद्यपींनी बिअरकडे मोर्चा वळवला. 650 रुपयांची बाटली 900 रुपयांपर्यंत गेली असून, प्रत्येक क्वॉर्टरमागे साठ रुपयांची वाढ झाली आहे. त्यामुळे यंदा विदेशी दारुपेक्षा बिअर पिण्याकडे मद्यपींचा कल अधिक दिसून आला. एकंदरीत वाढते पर्यटन, सण-समारंभ आणि महागलेली विदेशी दारु यांचा परिणाम म्हणून रायगड जिल्ह्यात डिसेंबरमध्ये बिअरची विक्री विक्रमी, तर वाईनची विक्री ढासळलेली असल्याचे चित्र समोर आले आहे.

दारु विक्रीवर दृष्टीक्षेप
दारुचे प्रकार - विक्री ( बल्क लिटरवर)
देशी - 9 लाख 51 हजार 381
विदेशी - लाख 14 हजार 426
बिअर - 24 लाख 96 हजार 960
वाईन - 64 हजार 758

विदेशी दारु विक्रीवर परिणाम
विदेशी दारुच्या विक्रीमध्ये भरमसाठ वाढ करण्यात आली आहे. 150 रुपयांना मिळणारी दारु 200हून अधिक रुपयांनी बाजारात विकण्यात आली. त्यामुळे यंदा विदेशी दारुपेक्षा बिअरला विक्रीला मद्यपींना पसंती दर्शविली. त्याचा परिणाम विदेशी दारुच्या विक्रीवर झाला असल्याची माहिती समोर येत आहे.

दारु पिण्याची वाढती क्रेझ
दारु पिण्याचा क्रेझ दिवसेंदिवस वाढत आहे. गावठी दारु बरोबरच देशी, विदेशी दारु पिणे ही फॅशन झाली आहे. नियमीत दारु पिणाऱ्यांसह काही जण महिन्यातून सहा महिन्यातून एकदा दारु पिणारेदेखील मोठ्या प्रमाणात आहेत. त्यामुळे मद्यपींची संख्या वाढत आहे.