52 हजार 230 प्रवाशांचा प्रवास
| पनवेल | वार्ताहर |
बाळासाहेब ठाकरे यांच्या स्मृतीदिनी सिडको महामंडळाने मुख्यमंत्र्याच्या आदेशानंतर नवी मुंबई मेट्रो रेल्वेची सेवा तळोजा आणि खारघर उपनगरातील प्रवाशांसाठी सुरू केल्यानंतर या प्रवासाने 50 हजारांची संख्या पार केली आहे. दिवाळीच्या सुट्यांमुळे मेट्रो रेल्वेतील गारेगार प्रवास करणारा वर्ग पर्यटनासाठी या रेल्वेचा अनुभव घेत आहे. बेलापूर, पेणधर या स्थानकांबरोबरच खारघर गाव आणि सेंट्रल पार्क या स्थानकांमधून प्रवास करणाऱ्या प्रवाशांची संख्या सर्वाधिक आहे. तसेच आरबीआय कॉलनी या स्थानकातून सर्वात कमी प्रवाशांनी प्रवास केल्याची नोंद झाली.
सोमवारी आठवड्याचा पहिला दिवस असल्याने आरबीआय कॉलनी हे स्थानक वगळता इतर 10 स्थानकांमध्ये पाचशेच्यावर प्रवासी संख्या नोंदविली गेली. सोमवारी दिवसभरात पेणधर आणि बेलापूर या स्थानकांतून सहा हजारांहून अधिक प्रवाशांनी टोकन तिकीट खरेदी केल्याची माहिती सिडको मंडळाच्या जनसंपर्क विभागाच्या सहअधिकारी गंधाली भोकरे यांनी दिली.
पेणधर ते बेलापूर या मार्गावर थेट तीन आसनी रिक्षातून आणि इकोव्हॅनमधून प्रवास करणाऱ्या प्रवाशांसाठी नवी मुंबई मेट्रो सर्वात लाभदायी आहे. या पल्ल्यावर मेट्रोने गारेगार प्रवास केल्यास 40 रुपये मोजावे लागतात. सध्या याच पल्ल्यावर नवी मुंबई महानगरपालिकेच्या परिवहन सेवेची 52 क्रमांकाची बस धावते. या बसच्या दिवसभरात 46 फेऱ्या होतात. यामध्ये वातानुकूलित बसचे तिकीट भाडे ( तळोजा ते बेलापूर) 27 रुपये आहे. तसेच याच मार्गावर साध्या बसचे 21 रुपये भाडे एनएमएमटी आकारते. त्यामुळे मेट्रो सुरू झाली असली तरी अद्याप बसचे प्रवासी या सेवेकडे वळलेले नाहीत. अजूनही तळोजा वसाहतीमधून जेथून बसचा प्रवास सुरू होतो त्या आसावरी गृहनिर्माण संस्थेच्या प्रवेशव्दारावरील बसथांब्यावर सकाळच्या वेळेत बस प्रवाशांचा रांगा दिसून येत आहेत. काही प्रमाणात बसचे प्रवासी मेट्रोतून प्रवास करत असले तरी तीन आसनी रिक्षा आणि इकोव्हॅनने पूर्वी प्रवास करणाऱ्या प्रवाशांनी जलद व सुलभ प्रवासामुळे मेट्रोला पसंती दिली आहे.
चार दिवसांत पेणधर ते बेलापूर या मार्गावर सुरू झालेल्या नवी मुंबई मेट्रोची गारेगार सफर तब्बल 52 हजार 230 प्रवाशांनी केली आहे. प्रवाशांचा चांगला प्रतिसाद मिळत आहे.
सिडको महामंडळ, जनसंपर्क विभाग
चार दिवसांतील महसूल
तारीख | टोकन महसूल | रुपये |
17 नोव्हेंबर | 9,316 | 2,76,069 |
18 नोव्हेंबर | 15,240 | 5,76,139 |
19 नोव्हेंबर | 17,661 | 4,63,502 |
20 नोव्हेंबर | 15,013 | 3,71,172 |