अल्टीमेट खो-खो स्पर्धा

गुजरातने उडवला राजस्थानचा धुव्वा

| नवी दिल्ली | वृत्तसंस्था |

अल्टीमेट खो-खोचा सीझन दोन कटक येथील जवाहरलाल नेहरू इनडोअर स्टेडियमवर सुरू आहे. आज झालेल्या तिसऱ्या सामन्यात राजस्थान वॉरियर्सने नाणेफेक जिंकून प्रथम आक्रमण घेत गुजरात जायंट्सला संरक्षण करण्यास आमंत्रित केले. या सामन्यात गुजरात जायंट्सने राजस्थान वॉरियर्सवर 41-30 (मध्यंतर 23-14) असा 11 गुणांनी धुव्वा उडवला.

गुजरातच्या पहिल्या तुकडीने जवळजवळ पावणे तीन मिनिटे संरक्षण केले. या तुकडीत कर्णधार अक्षय भांगरेने उत्कृष्ट संरक्षण केले, तर दुसरी तुकडीने जवळजवळ तीन मिनिटे संरक्षण करत ड्रीम रनचा एक गुणसुध्दा वसूल केला. या तुकडीतील सुयश गरगटेने उत्कृष्ट खेळ केला. या पाळीत राजस्थान वॉरियर्सने 3 आकाशीय सूर मारत खेळाडू बाद केले व 14 गुण वसूल केले. दुसऱ्या पाळीत गुजरात जायंट्सने पावणे तीन मिनिटात 12 गुण वसूल करत सामन्याचा निकाल ठरवून टाकला. या पाळीत जगन्नाथ मुर्मूने नाबाद राहत राजस्थानची पडझड थांबवल्यामुळे गुजरातला दुहेरी अंकात बढत घेता आली नाही. दुसऱ्या डावात पुन्हा एकदा राजस्थानने जोरदार मुसंडी मारण्याचा केलेला प्रयत्न गुजरात जायंट्सने उधळून लावला व या पाळीत गुजरातने ड्रीम रणचे दोन गुण वसूल केले, तर राजस्थानने 16 गुण मिळवत टक्कर देण्याचा प्रयत्न केला. शेवटच्या पाळीत गुजरातने जोरदार आक्रमण करत राजस्थानची दमछाक करत सहज विजयाकडे वाटचाल सुरु केली. या पाळीत 18 गुणांची कमाई करत शानदार विजय नोंदवला. या सामन्यात गुजरातच्या शुभम थोरातला सामनावीर पुरस्कार देऊन गौरविण्यात आले. खो खो फेडरेशन ऑफ इंडियाच्या सहकार्याने अमित बर्मन यांनी सुरु केलेली अल्टीमेट खो खो पहिल्या सीझनमध्ये जबरदस्त हिट ठरली होती जी भारतातील तिसरी सर्वात मोठी टेलिव्हिजन प्रेक्षकसंख्येच्या दृष्टीने बिगर क्रिकेट स्पर्धा म्हणून उदयास आलेली आहे.