प्रेमात अडथळा ठरणार्‍या 6 वर्षाच्या मुलाचा प्रियकराच्या मदतीने केला खून

| जालना | वृत्तसंस्था |
प्रेमामध्ये अडथळा ठरत असलेल्या आपल्याच मुलाचा आईने प्रियकराच्या मदतीने खून केलाचा संतापजनक प्रकार जालना जिल्ह्यातील अंबड तालुक्यात उघडकीस आला आहे. या प्रकरणी मृत मुलाच्या आईसह तिच्या प्रियकरालाही ताब्यात घेण्यात आले आहे.

पोलिसांनी दिलेल्या माहितीनुसार, अंबड तालुक्यातील डावरगाव येथील शीतल विनोद उघडे (वय -21) ही विवाहित महिला तिच्या जावेला घेऊन उपचारासाठी अंबड येथे दवाखान्यात आली होती. तिच्यासोबत तिचा सहा वर्षाचा मुलगा आदित्य विनोद उघडे देखील होता. जावेला दवाखान्यात भरती केल्यानंतर औषध आणण्याच्या निमित्ताने ही महिला दवाखान्याच्या बाहेर पडली, परंतु सोबत असलेल्या मुलाला कुठेतरी थांबवण्याचा बहाणा करून तिने असलेल्या प्रियकर नवनाथ शामराव जगधने (वय – 22, रा. पैठण ता. जि. संभाजीनगर) याच्या हवाली केले. यानंतर स्वत:च मुलगा हरवल्याचा बनाव करून अंबड पोलीस ठाण्यामध्ये तक्रार दिली. या तक्रारीच्या अनुषंगाने पोलीस यंत्रणा कामाला लागली आणि बुधवारी संध्याकाळी आदित्य उघडेचा मृतदेह घनसांगी रस्त्यावरील एका नाल्याच्या बाजूला पडला असल्याची माहिती पोलिसांना मिळाली. पोलिसांनी घटनास्थळी भेट दिली असता या मुलाच्या तोंडामध्ये बोळे कोंबलेले दिसले.

दरम्यान, पोलीस चौकशीमध्ये मुलाच्या आईने आणि तिचा प्रियकर नवनाथ जगधने याने सहा वर्षाच्या मुलाचा जीव घेतला असल्याची माहिती समोर आली. प्रियकर आणि प्रेयसीसह नवनाथचा मित्र गणेश रोकडे यास पोलिसांनी ताब्यात घेतले आहे. या प्रकरणी अंबड पोलीस ठाण्यामध्ये कलम 302 अन्वये खून केल्याचा गुन्हा दाखल झाला असून पुढील तपास सुरू आहे.