| पुणे | वृत्तसंस्था |
जिल्ह्यातील चारही लोकसभा निवडणुकांसाठी विविध राजकीय पक्षांच्या उमेदवारांकडून निवडणूक प्रचारासाठी केल्या जाणार्या खर्चाच्या नोंदी कक्ष अधिकारी व कर्मचार्यांनी काटेकोरपणे अद्ययावत ठेवाव्यात, असा आदेश जिल्हाधिकारी डॉ. सुहास दिवसे यांनी दिला आहे.
लोकसभा निवडणूक खर्चाबाबतच्या विहित नमुन्यातील नोंदी व उमेदवारांनी दिलेल्या खर्चाच्या माहितीच्या नोंदींची पडताळणी करावी. या खर्चाच्या नोंदवह्या अद्ययावत ठेवाव्यात, अशी सूचना विविध लोकसभा मतदारसंघासाठी नियुक्त करण्यात आलेल्या निवडणूक खर्च निरीक्षकांना दिल्या आहेत. दरम्यान, केंद्रीय लोकसेवा आयोगाने मावळ लोकसभा मतदारसंघासाठी निवडणूक खर्च निरीक्षक म्हणून सुंधाशू राय यांची नियुक्ती केली आहे. राय यांनी ‘पीएमआरडीए’ प्रशासकीय भवनातील मावळ लोकसभा मतदारसंघाच्या निवडणूक निर्णय अधिकारी कार्यालयास भेट दिली आणि तेथील कामकाजाची माहिती घेतली. या वेळी निवडणूक निर्णय अधिकारी दीपक सिंगला यांनी मावळ लोकसभा मतदारसंघामध्ये स्थापित केलेल्या विविध कक्षांची माहिती दिली. या वेळी सहायक निवडणूक निर्णय अधिकारी सुरेंद्र नवले, समन्वय अधिकारी प्रवीण ठाकरे, हिम्मत खराडे आदी उपस्थित होते.
निवडणूक आयोगाकडून खर्च संनियत्रणावरील लेख्यांची तपासणी केली जाते. यात प्रत्येक उमेदवाराने निवडणूक प्रचारासाठी केलेल्या दैनंदिन खर्चविषयक लेख्यांची तपासणी करण्यात येते. या अनुषंगाने राय यांनी निवडणूक खर्च व्यवस्थापन कक्षाच्या अधिकार्यांसमवेत आढावा बैठक घेतली. निवडणूक खर्चाची नोंद योग्य पद्धतीने घ्यावी, अशा सूचना निरीक्षकांना केल्या.