| उरण | वार्ताहर |
उरण शहरातील दोन दिवसांपूर्वी हादरवणारी घटना घडली आहे आहे. यशश्री शिंदे या वीस वर्षीय तरुणीची अत्यंत क्रूरपणे हत्या करण्यात आली. यशश्रीची हत्या दाऊद शेख नावाच्या व्यक्तीने केल्याचा संशय आहे. दरम्यान अजूनही या प्रकरणातील आरोपी फरार असून, त्याला पकडण्याच मोठं आव्हान पोलिसांसमोर आहे.
यशश्रीचा खून करणाऱ्या आरोपीच्या अटकेसाठी पोलिसांची चार पथके रवाना झाली आहेत, मात्र आरोपी पोलिसांना चकवा देत आहे. तो सतत आपलं लोकेशन बदत असल्याची माहिती न्हावा -शेवा बंदर विभागाचे सहय्यक पोलीस आयुक्त डॉ. विशाल नेहून यांनी दिली आहे. दरम्यान दुसरीकडे यशश्री शिंदेच्या हत्येमुळे वातावरण चांगलंच तापलं आहे. यशश्री शिंदेची निर्घुण हत्या करणाऱ्या आरोपीला तात्काळ फासावर लटकवा, अशी घोषणाबाजी करत हजारो नागरिकांनी रविवारी उरण पोलीस ठाण्यावर अक्रोश मोर्चा काढला, या मोर्चात महिला मोठ्या संख्येनं सहभागी झाल्या होत्या.
नराधम दाऊद शेख हा मूळचा कर्नाटकचा रहिवासी असून उरण येथे ड्रायव्हरचं काम करत होता. त्याची उरण येथे मयत यशश्रीशी भेट झाली. पोलिसांच्या माहितीनुसार याच मुलीच्या संदर्भात त्याच्यावर पोक्सो अंतर्गत गुन्हा दाखल झाला होता आणि त्यातच त्याला तुरुंगवासही झाला. काही महिन्यांपूर्वी तो बाहेर आला होता आणि त्यानंतर पुन्हा एकदा मुलीच्या संपर्कात येऊन शनिवारी ही घटना घडली आहे. पोलिसांनी आरोपीच्या जवळच्या सहकाऱ्यांना व परिवारातील लोकांना ताब्यात घेतले असून 4 टीम बंगळूरूला रवाना केल्या आहेत. पुढील तपास पोलीस करीत आहेत.