शासकीय कामात अडथळा, गुन्हा दाखल

। पनवेल । वार्ताहर ।
ई चलनाचा राग मनात धरून पोलीस नाईकाला शिवीगाळ करून पळून जात असणार्‍या ईसमा विरोधात पनवेल शहर पोलीस ठाण्यात गुन्हा दाखल करण्यात आला आहे. अक्षय प्रकाश अहिरे असे आरोपीचे नाव आहे. पनवेल शहर वाहतूक शाखेतील पोलीस नाईक भास्कर चौरे हे एसटी स्टँड येथे ड्युटी करत होते. यावेळी इको कार नंबर एम एच 12 पीसी 3097 वरील चालक वाहतुकीस अडथळा होईल अशा स्थितीत वाहन पार्क करून गेला होता. त्याच्यावर चलन मशीनद्वारे कारवाई करत असताना चालक त्याठिकाणी आला व कोणती कारवाई करता असे बोलून मोठमोठ्याने आरडाओरडा करून शिवीगाळ करण्यास सुरुवात केली. त्यानंतर गाडी चालू करून पोलिसांना शिवीगाळ करत तो पळून गेला. यावेळी डॉ. आंबेडकर पुतळ्यासमोर असलेल्या वाहतूक पोलिसांनी त्याला अडवले. त्याच्याकडे लायसन्सची मागणी केली असता तो गाडी मधून खाली उतरून हाताची मूठ बांधून पोलिसांच्या अंगावर मारण्यात धावून आला व पुन्हा शिवीगाळ करण्यास सुरुवात केली. अक्षय प्रकाश अहिरे (राहणार-भोर, पुणे) याच्याविरोधात शासकीय कामात अडथळा आणल्याप्रकरणी गुन्हा दाखल करण्यात आला आहे.