माथेरान घाटात भीषण अपघात

पर्यटक सुखरुप, कार दरीत पडता पडता वाचली

| माथेरान | प्रतिनिधी |

माथेरान फिरण्यासाठी आलेल्या पर्यटकांच्या एर्टिका कारला रविवारी भीषण अपघात झाला. या अपघातात कुठलीही जीवितहानी झाली नसली तरी दैव बलवत्तर म्हणून यातील सातही प्रवासी थोडक्यात बचावले आहेत. घाटातील पीटकर पॉईंट येथील अवघड वळणार चालकाचे नियंत्रण सुटल्याने कार थेट रस्त्याची सुरक्षा रेलिंग तोडून खोल दरीच्या बाजूस, म्हणजेच रस्ता आणि खोल दरीच्या मध्ये हेलकावे खात अडकून राहिली, त्यामुळे सर्व पर्यटक सुखरूप बचावल्याने पर्यटकांनी सुटकेचा श्वास घेतला. अन्यथा मोठी दुर्घटना घडली असती.

रविवारी सुट्टी असल्याने ठाणे जिल्ह्यातील बालकुम येथील राहणारा वाहन चालक सुरज येसले हा देखील परिसरातील सहा पर्यटकांना आपल्या वाहन एर्टिका कारमध्ये बसून भाडे म्हणून घेऊन आला होता. सकाळी सुरज हा माथेरान घाट चढण्यासाठी म्हणून नेरळ येथून सुरुवात केली होती. साडे दहा वाजण्याच्या सुमारास वॉटर पाईप या रेल्वे स्थानकाच्या जवळील असलेल्या पिटकर या अवघड वळणावर घाट चढत असताना चालकाचे वाहनावरील नियंत्रण सुटले.एकीकडे घाटात वाहनांची तर दुसरीकडे पर्यटकांची गर्दी होती.रविवार सुट्टी असल्याने ही गर्दी दिसून येत होती.दरम्यान सूरजला घाटात समोरून येणाऱ्या वाहनाचा अंदाज न आल्याने त्याने आपल्या कारची स्टेरिंग गोल फिरवली असता कार वरील नियंत्रण सुटले.कार रस्त्याच्या कडेला असणाऱ्या लोखंडी सुरक्षा रेलिंग तोडून खोल दरीच्या बाजूस अर्धवट अडकून पडली. दैवबलवत्तर म्हणून कार खोल दरीच्या बाजूला न पडता कार रस्ता आणि खोल दरीच्या मध्येच अर्धवट अवस्थेत हवेत हेलकावे खात अडकली. अपघात लक्षात घेता स्थानिक प्रवासी वाहन चालकांनी अपघातग्रस्त वाहनातील पर्यटकांना सुरक्षित बाहेर काढले. यावेळी आपण थोडक्यात बचावलो म्हणून पर्यटकांनी मोकळा श्वास घेतला. अन्यथा ही कार खोल दरीत कोसळली असती तर मोठी दुर्घटना घडली असती. या आधीदेखील याच ठिकाणी चार वाहने खोल दरीत कोसळत असताना सुरक्षा कठड्यावर अडकून राहिलेली आहेत. एमएमआरडीए आणि स्थानिक सार्वजनिक बांधकाम विभाग यांनी याकडे लक्ष देण्याची गरज असून, आणखी मजबूत सुरक्षा रेलिंग बांधणे गरजेचे आहे.