माणगावमधील नाट्यगृहाचे काम आठ वर्षांनंतरही अपूर्णच

बांधकामाचा पडदा अडकला निधीत

| माणगाव | प्रतिनिधी |

मुंबई-गोवा महामार्गावर असलेले माणगाव हे जिल्ह्याचे मध्यवर्ती ठिकाण असून, ते झपाट्याने विकसित होत आहे. शैक्षणिक, सामाजिक, धार्मिक क्षेत्राबरोबरच सांस्कृतिक जडणघडणीचे केंद्र म्हणून माणगावकडे पाहिले जाते. या भागातील सांस्कृतिक चळवळीला अधिक वाव मिळावा यासाठी आठ वर्षांपूर्वी माणगाव येथे नाट्यगृह मंजूर झाले होते. माणगावातील या नाट्यगृहाचे काम 50 टक्के झाले असून, बाल्कनीचे काम अंतिम टप्यात आले आहे. मात्र, अपुऱ्या निधीमुळे हे नाट्यगृह उद्याप अपूर्णच राहिले आहे. आता बांधकामासाठी लागणाऱ्या साहित्याचे दर मिळालेल्या निधीच्या तुलनेत आवाक्याबाहेर गेल्याने मंजूर निधीत या नाट्यगृहाचे काम कसे होणार, हा प्रश्नच सर्वांसमोर उभा राहिला आहे. त्यामुळे आताचे दर विचारात घेऊन पुनर्मूल्यांकन करून निधी मंजूर करावा, अशी मागणी नाट्यरसिकांसह माणगावकरांमधून होत आहे.

दक्षिण रायगडमधील सांस्कृतिक क्षेत्राला उत्तेजन मिळावे, तसेच येथे नवनवीन व व्यावसायिक नाटक प्रेक्षकांना पाहता यावीत यासाठी या भागातील नाट्यप्रेमींकडून नाट्यगृहाची मागणी करण्यात येत होती. या मागणीचा विचार करून माणगावातील शासकीय विश्रामगृहासमोर महाराष्ट्र शासनाचे संस्कृतीक कार्य विभागाकडून नाट्यगृह मंजूर केले होते. नाट्यगृह मंजूर होऊन आता तब्बल आठ वर्ष लोटली तरी या नाट्यगृहाचे बांधकाम अद्याप अपूर्ण आहे. तसेच, मजुरीही मोठ्या प्रमाणात वाढल्यामुळे नाट्यगृह बांधकामाला मंजुर झालेला निधी अपुरा पडत आहे. त्यामुळे नाट्यगृहाच्या बांधकामाचा तिढा कायम राहणार आहे. याासाठी शासनाकडून पुरेसा निधी मंजूर झाल्यास माणगावमध्ये सर्व सोयीनीयुक्त प्रशस्त असे नाट्यगृह उभारू शकेल, अशी आशा माणगावकरांना वाटत आहे.

आसन क्षमता वाढविण्याची गरज
माणगाव येथे उभारण्यात येत असलेल्या नाट्यगृहाची आसन क्षमता कमी असल्याने आयोजकांना दर्जेदार व नावाजलेली नाटके आणणे परवडणारे नाही. त्यामुळे प्रेक्षकांना आवडीची, गाजलेली व दर्जेदार नाटके बघता येणार नाहीत. अशी नाट्यगृहे सध्या रायगड जिल्ह्यात पनवेल, रोहा, महाड येथे आहेत. तर, रत्नागिरी जिल्ह्यात खेड व चिपळूण येथे आहेत. मात्र, माणगावचे नाट्यगृह 500 बैठक आसन क्षमतेचे असल्याने नाहिलाजास्तव आयोजकांना पर्यायाने तिकिटाचा दर वाढवावा लागेल. मात्र, हा खर्च उभा करण्यासाठी रसिकांच्या खिशाला कात्री लागणार आहे. त्यामुळे या नाट्यगृहाची आसन क्षमता वाढवून 700 ते 1000 केल्यास या नाट्यगृहात लहान-मोठे कार्यक्रम व दर्जेदार नाटक ठेवणे सोयीस्कर होईल.