सीएससी केंद्र ग्रामीण भागासाठी लाभदायी

शासकीय, खासगी सेवा पुरविण्याचे महत्त्वाचे माध्यम: अमिता पवार

| अलिबाग | प्रतिनिधी |

सीएससी केंद्र हे ग्रामीण भागातील नागरिकांसाठी विविध शासकीय आणि खासगी सेवा पुरविण्याचे महत्त्वाचे माध्यम आहे. महामंडळाने सीएससी केंद्रासमवेत केलेल्या करारामुळे महामंडळाच्या लाभार्थ्यांना योजनेचा लाभ घेण्यासाठी जिल्ह्याच्या ठिकाणी जाण्याची गरज भासणार नाही, त्यामुळे त्यांचा वेळ आणि पैसा वाचेल, अशी माहिती जिल्हा कौशल्य विकास, रोजगार व उद्योजकता मार्गदर्शन केंद्राच्या सहायक आयुक्त, अमिता पवार यांनी दिली आहे.

अण्णासाहेब पाटील आर्थिक मागास विकास महामंडळाचे लाभार्थी आता त्यांच्या जवळच्या कोणत्याही सीएससी केंद्रावर जाऊन महामंडळाच्या योजनांचा लाभ कमी दरात घेऊ शकतात. त्यामध्ये महामंडळाच्या योजनांसाठी ऑनलाईन अर्ज भरणे, कागदपत्र अपलोड करणे, योजनेची सद्य:स्थिती तपासणे आणि आवश्यक मार्गदर्शन मिळवणे यांसारखा सुविधांचा समावेश आहे.

राज्याच्या कानाकोपऱ्यात असलेल्या गरजू आणि पात्र तरुणांपर्यंत महामंडळाच्या योजना पोहोचणार आहेत. कमी खर्चात आणि त्यांच्या घराजवळ त्यांना आवश्यक सेवा मिळाल्यामुळे त्यांना स्वयंरोजगारासाठी प्रोत्साहित करून मराठा समाजातील तरुणांना उद्योजक करण्याचे महामंडळाचा उद्देश पूर्णत्वास नेणे सोपे होईल.

राज्यामध्ये सीएससीचे 71 हजार पेक्षा जास्त केंद्र कार्यरत असल्याने त्यांच्या माध्यमातून अण्णासाहेब पाटील महामंडळाच्या लाभार्थ्यांना त्यांच्या गावातूनच पात्रता प्रमाणपत्र कागदपत्र, बँकेचे कर्ज मंजुरी, बँकेचा हप्ता अपलोड करण्यासाठी प्रत्येकी रुपये 70 शुल्क आकारण्यात येणार, असे महामंडळाच्या व्यवस्थापकीय संचालक विजयसिंह देशमुख यांनी सांगितले आहे. या करारामुळे लाभार्थ्यांचा वेळ वाचणार आहे आणि त्यांना जिल्ह्याच्या ठिकाणी जाण्याची गरज लागणार नाही.
त्यामुळे ग्रामीण भागातील उद्योजकतेला चालना मिळेल. तसेच सद्यःस्थितीत महामंडळाच्या नावाखाली लाभार्थ्यांकडून पैसे उकळणाऱ्या अनधिकृत एजंट लोकांना आळा घालणं शक्य होईल. भविष्यात लाभार्थ्यांसाठी महामंडळाचे मोबाईल ॲप व चॅट बॉटसारख्या सुविधादेखील उपलब्ध करून देण्यात येणार आहेत, अशी माहिती अण्णासाहेब पाटील आर्थिक मागास विकास महामंडळ मर्यादित यांचे उपमहाव्यवस्थापक आकाश मोरे यांनी दिली आहे.