सहकारी सेवा संस्थांच्या निवडणुका स्थगित

राज्य सरकारचा निर्णय

| मुंबई | प्रतिनिधी |

राज्यातील सर्व सहकारी संस्थांच्या निवडणुका ज्या टप्प्यावर असतील, त्या टप्प्यावर स्थगित करून पुढे ढकलण्याचे आदेश शासनाने काढले आहेत. पुढील आदेश येईपर्यंत ‘अ’ आणि ‘ब’ वर्गातील सहकारी संस्थेच्या निवडणुका पुढे ढकलल्या आहेत. शुक्रवारी अर्ज माघारी घेण्याचा शेवटचा दिवस असताना आदेश असताना आदेश आला आहे. निवडणुकांची तयारी झाली असताना पुढे ढकलल्याने राजकीय पदाधिकारी नाराज झाले आहेत. मात्र, ‘क’ आणि ‘ड’ वर्गातील म्हणजेच गृहनिर्माण संस्थांच्या निवडणुका होणार आहेत.

आगामी स्थानिक स्वराज्य संस्थांच्या निवडणुकीसाठी हा निर्णय घेण्यात आला आहे. सध्या राज्यामध्ये नगरपालिका व नगरपंचायतीच्या निवडणुका जाहीर झालेल्या असून, येऊ घातलेल्या अन्य स्थानिक स्वराज्य संस्थांच्या निवडणुकांमुळे संबंधित प्रशासनिक व पोलीस यंत्रणा सदर निवडणूक प्रक्रियेत गुंतलेली आहे. या कारणास्तव सहकारी संस्थांच्या निवडणुकांसाठी आवश्यक मनुष्यबळ, पोलीस बंदोबस्त, मतदान केंद्रांची उपलब्धता याबाबतीत अडचणी निर्माण होण्याची शक्यता आहे. निवडणुकीसाठी पात्र असलेल्या राज्यातील सर्व सहकारी संस्थांच्या निवडणूक प्रक्रिया सुरळीत, पारदर्शक व भयमुक्त वातावरणात पार पाडण्यासाठी महाराष्ट्र सहकारी संस्था अधिनियम 1960 मधील कलम 73 कमध्ये निवडणुका पुढे ढकलण्याचा राज्य सरकारला अधिकार आहेत. त्यानुसार हा निर्णय घेण्यात आल्याचे शासनाच्या आदेशात म्हटले आहे.