माथेरान मिनीबस घाट रस्तामध्ये बंद; अनेक प्रवाशांचे वाचले प्राण

घाटातून प्रवास करताना मिनिबसचा गियर बॉक्स निकामी

। नेरळ । प्रतिनिधी ।

कर्जत येथून पर्यटनस्थळ असलेल्या माथेरानसाठी सकाळी निघालेली मिनीबस घाटरस्ता मध्ये बंद पडली. 45 प्रवासी प्रवास करीत असलेल्या मिनिबसचे गियर बॉक्स खराब झाल्याने गाडी रस्त्याच्या कडेला लावावी लागली. मिनीबस चालक नितीन जाधव यांनी प्रसंगावधान राखल्याने अनेक प्रवाशांचे प्राण वाचले आहेत.

कर्जत एसटी आगारातून कर्जत- नेरळ- माथेरान अशी मिनीबस आज सकाळी नेहमीप्रमाणे माथेरान येथे जाण्यास निघाली. सकाळी सव्वा आठ वाजता निघालेली मिनीबस कर्जत येथून निघाली आणि नेरळ येथे वेळेवर पोहचली. सकाळची वेळ असल्याने या 30 सीट वाहून नेण्याची क्षमता असलेल्या मिनीबस मध्ये तब्बल 45 प्रवासी प्रवास करीत होते. नेरळ येथून माथेरान घाट रस्त्याने ही मिनीबस प्रवाशांना घेऊन पुढे जात असताना जुन्मापट्टी येथील चढाव पार केल्यावर गाडीचे गियर पडले जात नसल्याचे चालक नितीन जाधव यांच्या लक्षात आले. त्या ठिकाणी चढाव पूर्ण केल्यावर काही अंतर पुढे नेऊन चालक जाधव यांनी गाडी रस्त्याच्या कडेला थांबवली. प्रवाशांना तत्काळ प्रसंगावधान दाखवत सुरक्षित खाली उतरविले. त्यावेळी गाडी मध्ये काय बिघाड झाला आहे याची माहिती प्रवाशांना कळली. त्यामुळे दैव बलवत्तर असे म्हणण्याची वेळ प्रवाशांवर आली.

जुम्मापट्टी येथील वळणाचा तीव्र चढाव पार करून पुढे मिनीबस थांबल्याने मोठा अनर्थ टळला आहे. त्यात माथेरान येथून नेरळकडे परत येताना मिनिबसचे गियर बॉक्स मध्ये बिघाड झाली असती तर मोठा अपघात नेरळ- माथेरान घाटात राज्य परिवहन महामंडळाच्या मिनीबस गाडीला होऊ शकला असता. त्याचवेळी घाटात अनेक ठिकाणी तीव्र चढाव आहेत आणि त्या ठिकाणी गाडी बंद पडली असती तर देखील मोठा अनर्थ घडला असतात. मात्र, चालकाच्या प्रसंगावधान यामुळे मिनीबस मधून प्रवास करणाऱ्या 45 प्रवाशांचे प्राण वाचले आहेत.