रेल्वेत चढताना ज्येष्ठांची कसरत

सापे-वामने स्थानकात प्रवाशांचे हाल; चालत्या रेल्वेतून उड्या मारण्याची वेळ

| महाड | प्रतिनिधी |

कोकण रेल्वे मार्गावरील सापे-वामने रेल्वे स्थानकाच्या विकासासाठी रेल्वे प्रशासनाने 1.25 कोटी रुपयांचा निधी मंजूर केला आहे. या निधीचे प्रवासी आणि स्थानिक नागरिकांकडून स्वागत करण्यात येत असून, मंजूर निधीतून विकासकामांना लवकरात लवकर सुरुवात करावी, अशी जोरदार मागणी होत आहे. तर दुसरीकडे स्थानकावर फलाट नसल्यामुळे प्रवाशांना अक्षरश: चालत्या रेल्वेतून उड्या मारव्या लागत असून, रेल्वेत चढताना देखील प्रवाशांना विशेष करून ज्येष्ठ नागरिकांना मोठी कसरत करावी लागत आहे.

सापे-वामने स्थानकावर सध्या प्लॅटफॉर्मची उंची अत्यंत कमी म्हणजेच रेल्वे पटरीवरुन रेल्वेमध्ये चढावे लागत आहे. त्यामुळे ज्येष्ठ नागरिक, महिला आणि लहान मुलांना रेल्वेत चढ-उतार करताना मोठी कसरत करावी लागते. तसेच स्थानकावर छप्पर, पिण्याचे पाणी, प्रकाश व्यवस्था, स्वच्छतागृह यांसारख्या मूलभूत सुविधांची कमतरता आहे. या सर्व बाबी लक्षात घेऊन रेल्वे प्रशासनाने 2026-27 च्या विकास आराखड्यात या स्थानकाचा समावेश करून 1.25 कोटींचा निधी मंजूर केला आहे. या कामांची तांत्रिक प्रक्रिया सुरू असून, मार्च 2027 पर्यंत काम पूर्ण करण्याचे उद्दिष्ट आहे. मात्र, हे काम सुरू होऊन पुर्णत्वास जाईपर्यंत प्रवासी वर्गाला जीव मुठीत धरून रेल्वेत जढ-उतार करताना मोठी कसरत करावी लागणार आहे.

सापे-वामने रेल्वे स्थानकावर उंचीचे प्लॅटफॉर्म नसल्याकारणाने रेल्वे अगदीच काही मिनीटे थांबते. वाढत्या प्रवाशांच्या गर्दीमुळे बुधवारी (दि.2) एका प्रवासी जेष्ठ महिलेला गर्दीमुळे आणि प्लॅटफॉर्मच नसल्यामुळे रेल्वेमध्ये चढता आले नाही. घाई गडबडीत त्यांचा रेल्वेच्या पायरीवरुन पाय घसरला. सुदैवाने यात त्यांना मोठी दुखापत झाली नसली, तरी दिवसेंदिवस अशा अपघाताच्या घटना वाढत आहेत. या कामांची तांत्रिक प्रक्रिया सुरू असून मार्च 2027 पर्यंत काम पूर्ण करण्याचे उद्दिष्ट आहे. मात्र, “पावसाळा संपताच या कामांना प्रत्यक्ष सुरुवात व्हावी. संबधित रेल्वे प्रशासनाने तात्काळ प्रवशांच्या जिवाशी खेळण्यापेक्षा मंजुर निधीच्या माध्यमातून तात्काळ उंचीचे प्लॅटफॉर्म बांधण्यात यावे, जेणेकरुन प्रवाशांचे हाल होणार नाहीत,” अशी मागणी प्रवासी वर्गातून जोर धरत आहे.

केवळ कागदावर निधी नको
“निधी मंजूर झाल्याबद्दल आम्ही रेल्वे प्रशासनाचे आभारी आहोत. हा आमच्या दीर्घकाळच्या मागणीचा विजय आहे. परंतु, केवळ कागदावर निधी मंजूर नको, तर प्रत्यक्षात काम दिसले पाहिजे. पावसाळ्यानंतर लगेचच कामाला सुरुवात करावी, जेणेकरून पुढील उन्हाळ्यापूर्वी प्रवाशांना दिलासा मिळेल,” अशी प्रतिक्रिया स्थानिक प्रवासी संघटनेने व्यक्त केली आहे. तसेच, 1.25 कोटींचा निधी मंजूर होणे ही सापे-वामने स्थानकाच्या विकासाच्या दृष्टीने पहिली मोठी पायरी आहे. आता प्रशासनाने याला गती देऊन लवकरात लवकर काम सुरू केल्यास प्रवाशांचा प्रवास अधिक सुरक्षित आणि सुखकर होईल, अशी अपेक्षा देखील संघटनेकडून व्यक्त होत आहे.