निवडणूक आयोग ही पक्षचोरणारी टोळी!

ज्ञानेश कुमार यांच्यावर उद्धव ठाकरेंचा घणाघात; काँग्रेसचाही हल्लाबोल

| मुंबई | प्रतिनिधी |

निवडणूक आयोगाच्या कारभारावरून देशातील राजकीय वातावरण तापले असून, मुख्य निवडणूक आयुक्त ज्ञानेश कुमार यांच्यावर विरोधकांनी जोरदार हल्लाबोल केला आहे. निवडणूक आयुक्त सुखबीरसिंग संधू आणि विवेक जोशी यांनी गेल्या दहा महिन्यांत आयोगाच्या निर्णयप्रक्रियेवर तब्बल 14 वेळा आक्षेप नोंदवल्याचे एका वृत्तपत्राच्या वृत्तातून समोर आल्यानंतर काँग्रेससह विरोधकांनी निवडणूक आयोगाच्या कार्यपद्धतीवर गंभीर प्रश्न उपस्थित केले आहेत. याच पार्श्वभूमीवर शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी ज्ञानेश कुमार यांच्यावर थेट निशाणा साधत, ‌‘निवडणूक आयोग ही पक्ष चोरणारी टोळी आहे,‌’ असा घणाघाती आरोप केला.

उद्धव ठाकरे यांनी ज्ञानेश कुमार यांना तातडीने पदावरून हटवून तुरुंगात पाठवण्याची मागणी केली. तसेच महाराष्ट्र, पश्चिम बंगाल आणि तामिळनाडूतील मागील विधानसभा निवडणुका पुन्हा घेऊन त्या मतपत्रिकेवर घेण्याची मागणीही त्यांनी केली. ‌‘लोकशाही वाचवण्यासाठी विरोधकांनी एकत्र आले पाहिजे,‌’ असे आवाहनही ठाकरे यांनी केले.

एका वृत्तपत्राच्या वृत्तानुसार, निवडणूक आयुक्त सुखबीरसिंग संधू आणि विवेक जोशी यांनी गेल्या दहा महिन्यांत किमान 14 वेळा आयोगाच्या निर्णयांवर औपचारिक आक्षेप नोंदवले. नवीन मतदारांच्या नोंदणीसाठीच्या फॉर्म-6 मधील बदल, मतदारांची नावे वगळणे अथवा समाविष्ट करणे, एसआयआर प्रक्रियेतील निर्णय तसेच मतदार यादीच्या डिजिटल व्यवस्थेचे केंद्रीकरण यांसारख्या मुद्द्यांवर त्यांनी प्रश्न उपस्थित केल्याचे वृत्त आहे. काही आक्षेपांमध्ये संबंधित निर्णय आपली माहिती किंवा संमती न घेता घेतल्याचा दावा करण्यात आल्याचेही वृत्तात नमूद आहे. दोन्ही आयुक्तांनी काही प्रकरणांमध्ये कॅबिनेट सचिवांकडेही आपली चिंता मांडल्याचे इंडियन एक्स्प्रेसने म्हटले आहे.

लोकशाहीचा खून केला : उद्धव ठाकरे
या पार्श्वभूमीवर उद्धव ठाकरे यांनी पत्रकार परिषदेत ज्ञानेश कुमार यांच्यावर अत्यंत तीव्र शब्दांत टीका केली. ज्ञानेश कुमार यांनी लोकशाहीचा खून केला आहे. त्यांना तातडीने पदावरून हटवून तुरुंगात टाकले पाहिजे. त्यांचा म्होरक्या कोण आहे, हे समोर आले पाहिजे, असे ठाकरे म्हणाले. ‌‘मुख्य निवडणूक आयुक्त मनमानी कारभार करत आहेत. दोन निवडणूक आयुक्तांनी त्यांच्या निर्णयांवर आक्षेप घेतला असून त्याची तक्रार कॅबिनेट सचिवांकडे करण्यात आली आहे. न्यायव्यवस्थेने या प्रकरणाची स्वतःहून दखल घ्यावी,‌’ अशी मागणीही त्यांनी केली.

‌‘तीन राज्यांच्या निवडणुका पुन्हा घ्या‌’
महाराष्ट्रासह पश्चिम बंगाल आणि तामिळनाडूमधील निवडणुका पुन्हा घेण्याची मागणी ठाकरे यांनी केली. या निवडणुका मतपत्रिकेवर घेण्यात याव्यात, अशी त्यांची भूमिका आहे. महाराष्ट्रातील मतदारसंख्येबाबतही त्यांनी गंभीर आरोप केले; मात्र या आरोपांची स्वतंत्र पुष्टी उपलब्ध झालेली नाही.

काँग्रेसचाही हल्लाबोल
या प्रकरणावर काँग्रेसनेही निवडणूक आयोगाच्या कार्यपद्धतीवर प्रश्न उपस्थित केले. काँग्रेस नेत्यांनी आयोगाच्या निर्णयप्रक्रियेबाबत आणि त्याच्या विश्वासार्हतेबाबत चिंता व्यक्त केली. पक्षाच्या नेत्यांनी ज्ञानेश कुमार यांच्या पदावर राहण्यावरही प्रश्न उपस्थित केला आहे. काँग्रेस नेते मनीष तिवारी यांनीही आयोगाचा कारभार ‌‘अदृश्य हातांद्वारे‌’ चालत असल्याचा आरोप केला. नियमबाह्य पद्धतीने किंवा बहुमताच्या मतांकडे दुर्लक्ष करून निर्णय घेतले जात असतील, तर त्यावर गंभीर प्रश्न उपस्थित होतात, असे त्यांनी म्हटले.

आयोगाचे स्पष्टीकरणही समोर
दरम्यान, निवडणूक आयोगाने मात्र आयोगात फूट किंवा निर्णयप्रक्रियेत एकतर्फी कारभार असल्याचे संकेत फेटाळले आहेत. एसआयआरसह आयोगाचे सर्व निर्णय तिन्ही निवडणूक आयुक्तांच्या मान्यतेने आणि एकमताने झाले, असे आयोगाने स्पष्ट केले आहे. वेगवेगळी मते मांडणे ही अंतर्गत विचारविनिमय प्रक्रियेचा भाग असल्याचेही आयोगाने म्हटले आहे.