रायगडमधील 3 लाख 82 हजार मतदार रडारवर

2002 च्या मतदार यादीशी जुळणी न झाल्याने कारवाई

| रायगड | प्रतिनिधी |

ज्या मतदारांची नावे 2002 च्या मतदार यादीशी जुळत नाहीत किंवा जुळणी प्रक्रियेत विसंगती आढळलेली आहे. अशा मतदारांना नोंदणी अधिकाऱ्यांमार्फत नोटीस बजावण्यात येणार असून, सादर करण्यात येणारे पुरावे आणि सुनावणीनंतर संबंधितांबाबत योग्य निर्णय घेण्यात येणार असल्याचे जिल्हा निवडणूक विभागाच्या वतीने सांगण्यात आले. दरम्यान, रायगड जिल्ह्यात 2002 च्या मतदार यादीतील जुळणी प्रक्रियेत विसंगती असणारे 3 लाख 82 हजार 844 मतदार आहेत. या सर्वांना आता नोटीसा धाडण्यात येणार आहेत. 30 सप्टेंबरपर्यंत 1 लाख 21 हजार 156 मतदारांना नोटीस पाठविण्यात आल्या आहेत. 2 लाख 61 हजार 675 मतदारांना नोटीस पाठविण्याचे काम युद्धपातळीवर सुरू आहे.

रायगड जिल्ह्यात आधीच मयत, स्थलांतरीत अथवा एकापेक्षा अनेक मतदारसंघात म्हणजेच दुबार नावे असणारी मतदार होते. या सर्वांची नावे प्रारूप मतदार यादीतून वगळण्यात आलेली आहे. या सर्वांना मतदार यादीत पुन्हा नावे टाकण्यासाठी पुन्हा फार्मनंबर 6 आणि 7 भरून द्यावा लागणार आहे. हा अर्ज त्यांना सध्या, एसआयआर कार्यक्रमानंतर किंवा 2029 निवडणुकीपूर्वी कधीही भरता येणार आहे. दरम्यान, या शिवाय 2002 च्या यादीतील नावाशी विसंगती असणारी 3 लाख 82 हजार 844 मतदारांची नावे आहे. या सर्वांना आता मतदारसंघनिहाय नोटीस बजावण्यात येणार आहे. तसेच त्यांच्याकडून पुरावा घेण्यात येणार असून मतदार नोंदणी अधिकारी यांच्यावतीने त्यांची सुनावणी घेण्यात येणार आहे. त्यानंतर संबंधीत मतदारांची नावे पुन्हा मतदार यादी घ्याची की नाही, याबाबत अंतिम निर्णय घेण्यात येणार आहे. नोटीस पाठविण्यात आलेल्या मतदारांना सुनावणीसाठी मतदार नोंदणी अधिकारी यांच्या दालनात बोलावण्यात येणार होते. निवडणूक आयोगाच्या नव्या निर्देशानुसार आता नोटीस पाठविण्यात आलेल्या प्रत्येक मतदाराच्या घरी बीएलओ जाऊन त्याचे म्हणणे ऐकून ग्राह्य पुराव्याच्या अनुषंगाने त्या मतदाराचे नाव नोंदणी करण्यात येणार आहे.

रायगड जिल्ह्यात सात विधानसभा मतदार संघ आहेत. या सातही मतदार संघातून एसआरआय मोहिमेमध्ये तब्बल 3 लाख 82 हजार 844 मतदारांना नोटीस पाठविण्यात येणार आहेत. यामध्ये पनवेल 1 लाख 50 हजार 424 मतदार, कर्जत 33 हजार 294 मतदार , उरण 58 हजार 698, पेण 30 हजार 381 मतदार , अलिबाग 42 हजार 741 मतदार, श्रीवर्धन 24 हजार 860 मतदार आणि महाड विधानसभा मतदार संघात 42 हजार 433 मतदारांना नितीश पाठविण्यात येणार आहेत.

30 सप्टेंबर 2026 पर्यंत रायगड जिल्ह्यात 1 लाख 21 हजार 156 मतदारांना नोटीस पाठविण्यात आल्या आहेत. यामध्ये पनवेल 41 हजार 57 मतदार, कर्जत 14 हजार 913 मतदार , उरण 11 हजार 286 मतदार, पेण 16 हजार 679 मतदार, अलिबाग 9 हजार 772 मतदार, श्रीवर्धन 14 हजार 824 मतदार आणि महाड मतदारसंघात 2 हजार 585 मतदारांचा समावेश आहे.

रायगड जिल्ह्यातील 2 लाख 61 हजार 675 मतदारांना नोटीस पाठविण्याचे काम युद्ध पातळीवर सुरू आहे. यामष्ये पनवेल 1 लाख 9 हजार 327मतदार, कर्जत 18 हजार 381 मतदार, उरण 47 हजार 412 मतदार , पेण 13 हजार 702 मतदार , अलिबाग 32 हजार 969 मतदार, श्रीवर्धन 10 हजार 36 मतदार आणि महाड विधानसभा मतदार संघातील 29 हजार 848 मतदारांचा समावेश आहे.

केंद्रांच्या रचनेत आवश्यक बदल
मतदारांची संख्या, मतदान केंद्रांची भौगोलिक स्थिती तसेच मतदारांना उपलब्ध असलेल्या सुविधांचा विचार करून केंद्रांच्या रचनेत आवश्यक बदल सुचविण्यात आले आहेत. मतदान केंद्र सुसूत्रीकरण प्रक्रियेत केवळ नवीन मतदान केंद्रांची निर्मितीच नव्हे, तर विद्यमान केंद्रांचे विभाजन व विलीनीकरण करण्याचे प्रस्ताव आहेत. याशिवाय काही मतदान केंद्रांच्या नावात तसेच ठिकाणात बदल प्रस्तावित आहेत. मतदारसंख्या, भौगोलिक स्थिती आणि सुविधांचा विचार करून हे बदल करण्यात येत आहेत. अंतिम निर्णयानंतर रचना स्पष्ट होईल. ज्या ठिकाणी यापूर्वी 1 हजार 300 पेक्षा जास्त मतदार आहेत, अशा मतदान केंद्राचे विभाजन करण्यात येणार आहे.