श्री शिवसाई क्रीडा मंडळ मापगांव आयोजित क्रिकेट स्पर्धेत शिवसाई मापगांव विजयी

। अलिबाग । वार्ताहर ।
श्री शिवसाई क्रीडा मंडळ मापगांव यांनी 13 जानेवारी ते 16 जानेवारी असे चार दिवस स्वर्गीय वसंत राऊत स्मृती चषक टेनिस बॉलचे मर्यादित षटकांच्या क्रिकेटच्या भव्य स्पर्धा आयोजित केल्या होत्या. ही भव्य स्पर्धा मापगाव क्रिकेट मैदानावर पार पडली, स्पर्धेत एकूण 32 संघांनी सहभाग घेतला होता. स्पर्धाकाळात विविध सामाजिक व राजकीय क्षेत्रातील मान्यवरांनी उपस्थित राहून आयोजकांचा उत्साह वाढवला व स्पर्धकांना चौकार व षटकार आदी उत्कृष्ट कामगिरी करणार्‍यांना बक्षिसे देत प्रोत्साहन दिले.
अंतिम सामना श्री शिवसाई मापगांव आणि टाकादेवी मांडवा यांच्यात होऊन शिवसाई मापगांव संघ विजयी झाला. स्पर्धेत प्रथम क्रमांक शिवसाई मापगांव संघाला 35,000 रुपये व चषक देण्यात आले, तर द्वितीय क्रमांक टाकादेवी मांडवा संघास 20,000हजार रुपये व चषक देण्यात आले. तृतीय क्रमांक फुलाईदेवी सासवणे 8,000 रुपये व चषक पटकविले, तर चतुर्थ क्रमांक जोगेश्‍वरी आवास संघाने पटकविले. उत्कृष्ट गोलंदाज म्हणून आदित्य गिजम फुलाईदेवी सासवणे संघ याने पटकविले तर फलंदाज म्हणून साई राणे शिवसाई मापगांव संघ याने पटकविले, तसेच मालिकावीर म्हणून शुभम दळवी टाकादेवी मांडवा याने पटकविले. स्पर्धेत सिक्सर किंग म्हणून शुभम दळवी टाकादेवी मांडवा याने पटकविले तर उत्कृष्ट क्षेत्ररक्षक म्हणून अजित माने शिवसाई मापगांव याने पटकविले. बक्षीस वितरण सुनिल थळे, अमित नाईक, बहिरोळे येथील केशव चांदोरकर, पिंट्या गायकवाड आदी मान्यवरांच्या उपस्थितीत पार पडला. स्पर्धेत समालोचक म्हणून यश मापगावकर, सुहास फाटक, नदीम वाकनिस, सुजित पाटील यांनी उत्कृष्ट कामगिरी बजावली. स्पर्धा यशस्वी होण्यासाठी शिवसाई क्रीडा मंडळाचे सदस्य यांनी विशेष मेहनत घेतली.