कर्जतचा वनरक्षक लाचलुचपत विभागाच्या जाळ्यात

4 हजारांची लाच घेताना रंगेहाथ पकडले
। नेरळ । प्रतिनिधी ।
कर्जत शहरातील खासगी जमिनीवरील झाडे तोडण्याची कर्जत नगरपरिषदने परवानगी दिली असताना तोडलेल्या झाडांबद्दल अलिबाग वन विभागाकडे तक्रार करतो, अशी धमकी देणार्‍या अंगद विठ्ठल नागरगोजे या वनरक्षकास 4 हजार रुपयांची लाच घेताना लाचलुचपत प्रतिबंधक विभागाने रंगेहाथ पकडले. गेले 10 दिवस मानसिक त्रास दिल्याने माजी नगरसेवक बाळाजी विचारे यांनी वनरक्षकाची तक्रार केल्यानंतर ठाणे लाचलुचपत विभागाने लावलेल्या सापळ्यात वनरक्षक चार हजाराची लाच घेताना असल्याचे दिसून आले. याबाबत कर्जत पोलीस ठाण्यात गुन्ह्याची नोंद करण्यात आली आहे.

कर्जत नगरपरिषद हद्दीमधील भिसेगाव येथे राहणारे माजी नगरसेवक बाळाजी विचारे यांना त्यांच्या सिटी सर्व्हे नंबर 443 मधील जमीन विकसित करायची होती. त्या जमिनीत काही झाडे असल्याने ती झाडे तोडणे आवश्यक असल्याने विचारे यांच्या पत्नी माजी नगरसेविका येमुताई विचारे या 8 जून रोजी कर्जत गुंडगे येथे असलेल्या वन विभागाच्या कार्यालयात झाडे तोडण्याची परवानगी मागण्यासाठी गेल्या होत्या. मात्र तेथे वन अधिकारी यांनी सिटी सर्व्हे 443 हे कर्जत नगरपरिषद हद्दीतील असल्याने कर्जत नगरपरिषदची परवानगी घ्यावी, असे सूचित केले. त्यानंतर येमुताई विचारे यांनी नगरपरिषदमध्ये जाऊन मुख्याधिकारी यांच्याकडे झाडे तोडण्याची परवानगी मागण्यासाठी अर्ज केला.

18 जून रोजी कर्जत नगरपरिषदची परवानगी मिळाल्यानंतर विचारे यांनी त्या जमिनीवरील झाडे तोडल्यानंतर कर्जत पश्‍चिम वन विभाग कार्यालयात वनरक्षक अंगद विठ्ठल नागरगोजे हे विचारे यांच्या कार्यालयात आले. त्यांनी बाळाजी विचारे यांना तुम्ही झाडे तोडली आहेत, तुमची तक्रार अलिबाग येथील वन विभागाच्या मुख्य कार्यालयात करतो, अशी धमकी दिली. तसेच 15 हजार रुपये दिले तर तक्रार करणार नाही, असे सांगितले.

शेवटी मध्यस्थी करीत पाच हजार रुपयांवर तडजोड झाली. जमिनीतील झाडे तोडून जागा सपाट करून घेणारे विचारे यांच्या पत्नी माजी नगरसेविका येमुताई विचारे या आजारी असतात. त्यामुळे मागील आठवड्यात उपचार सुरू होते. त्यामुळे तक्रार न करण्याच्या बदल्यात ठरलेली पाच हजाराची रक्कम वनरक्षक नागरगोजे यांना बाळाजी विचारे हे देऊ शकले नाहीत. मात्र सातत्याने फोन करून नागरगोजे हे विचारे यांना त्रास देऊ लागले. तसेव भिसेगाव येथील कार्यालयात येऊन तक्रार आणि कारवाईची धमकी देऊ लागले. त्यामुळे लाचलुचपत विभागाकडे तक्रार करण्याची कोणतीही इच्छा नसताना बाळाजी विचारे यांनी ठाणे लाचलुचपत विभागाकडे 22 जून रोजी अंगद विठ्ठल नागरगोजे यांच्याविरोधात तक्रार दिली.

24 जून रोजी ठाणे लाचलुचपत विभागाच्या पथकाने भिसेगाव येथे सापळा लावता असता सायंकाळी चार वाजून 40 मिनिटांनी कर्जत पश्‍चिम विभागाचे वनरक्षक नागरगोजे हे लाचेची रक्कम घ्यायला आले.त्या ठिकाणी चार हजाराची लाच स्वीकारताना अंगद नागरगोजे यांना ठाणे लाचलुचपत विभागाच्या पथकाने ताब्यात घेतले.

आम्हाला कर्जत नगरपरिषदेकडून झाडे तोडण्याची परवानगी मिळाली होती आणि त्यानुसार आम्ही झाडे तोडली. परंतु कोणतेही कारण नसताना वनरक्षक नागरगोजे हे घरी आणि कार्यालयात येऊन अलिबाग वन विभागाच्या नावाने धमकी देत होते.

बाळाजी विचारे, तक्रारदार