बुद्ध पौर्णिमेच्या लख्ख प्रकाशात वन्यजीवांची गणना
। आगरदांडा । गणेश चोडणेकर ।
बुद्ध पौर्णिमेचा चंद्राच लख्ख पडलेला प्रकाश,त्या चांदण्या रात्री पशु, पक्ष्यांच्या आवाजाने भारुन गेलेला परिसर, त्या अंधारातही वन्यपशुंच्या प्रतीक्षेत असलेल्या वन अधिकारी आणि कर्मचार्यांची पाणवठ्याकडे लागलेली नजर अशा वातावरणात फणसाडच्या निबिड अभयारण्यात वन्यपशुंसह विविध पक्ष्यांची सुरु करण्यात आली.यामध्ये बिबट्याच्या पाऊलखुणांबरोबरच पक्ष्यांचा चिवचिवाट वाढल्याचा दावा वनविभागाने केलेला आहे.
सुमारे 54 चौरस किलोमीटर परिसरात फणसाड अभयारण्याची व्याप्ती असून समुद्रसपाटीपासून जवळ असणारे असे हे अभयारण्य आहे.जगातील सर्वात लांब असलेल्या वेलीपैकी एक असलेली गारंबीची वेल या ठिकाणी आढळून येते. फणसाड अभयारण्य प्रशासनाने तीन परिमंडळामध्ये 13 मचाण बांधून वन्यजीव गणनेस प्रारंभ केला होता.या गणनेसाठी वन विभागाचे अधिकारी,कर्मचारी,तसेच ग्रीन वर्क ट्रस्ट व ऑऊल फाउंडेशन तसेच मानद वन्यजीव सदस्य यांच्या मदतीने सदरची गणना करण्यात आली.सदरची गणना चन्द्रप्रकाशात एका दिवसाची करण्यात आली आहे.
फुलपाखरांच्या 90 जाती
90 प्रकारची फुलपाखरे येथे बागडताना दिसतात. फुलपाखरामध्ये ब्लु मारगोन, मॅप,कॉमन नवाब अश्या वैशीष्ठपूर्ण जाती आढळून आल्या आहेत शिवाय वन्य पशुंंची गणना करताना भेकर,रानडुकर,ससा,रानमांजर, रानगवा,शेकरू,सांबर,खवल्या मांजर,आदींचे दर्शन होऊन त्यांची गणना करण्यात आली. तसेच काही पाणवट्यावर बिबट्याच्या पाऊलखुणा सुद्धा सापडल्या आहेत.खूप दिवसाच्या प्रतीक्षेनंतर बिबट्यांचे अस्तित्व आढळून आल्याने सर्वत्र समाधान व्यक्त होत आहे.तसेच पक्ष्यांचे सुद्धा दर्शन होऊन त्याची सुद्धा गणना करण्यात आली आहे. मोर, ब्राह्मण, घार, फ्रॉग बर्ड हॉर्न बेल,रातवा,ब्लॅक दरांगो आदी पक्षी आढळून आले आहेत.
सदरची गणना एक दिवसाची असून त्यामध्ये आढळले वन्यजीव म्हणजे तेवढेच वन्यजीव समजण्यात येऊ नये.हे वन्यजीव त्या दिवसात आढळून आलेले आहेत.फणसाड अभयारण्यात वन्यजीवांची खूप मोठी संख्या असून सदरचे क्षेत्र खूप मोठे असून सर्व वन्यजीव विखुरलेले आहे.
राजवर्धन भोसले, वनपरिक्षेत्र अधिकारी