। नवी दिल्ली । वृत्तसंस्था ।
मिळालेल्या माहितीनुसार इराणमधील एका प्रवासी वाहतूक विमानात बॉम्ब असल्याचा दावा केला जातोय. इराणमधील एका प्रवासी वाहतूक विमानात बॉम्ब असल्याच्या धमकीनंतर एकच खळबळ उडाली आहे. हे विमान इराणहून चीनच्या दिशेने जात आहे. मात्र भारतीय हवाई हद्दीत आल्यानंतर या विमानात बॉम्ब असल्याची धमकी दिल्ली पोलिसांना मिळाली. भारताने या विमानाला दिल्लीत उतरण्यास परवानगी नाकारली असून भारतीय हवाई दल सतर्क झाले आहे. सुरक्षा यंत्रणांकडून या विमानावर लक्ष ठेवलं जातंय.
हे विमान इराणमधील तेहरान येथून चीनमधील गुआंगझोऊ येथे जात होते. मात्र विमानात बॉम्ब असल्याची धमकी मिळाल्यानंतर महान एअरने विमान दिल्लीत उतरवण्यासाठी परवानगी मागितली. दिल्ली पोलीस तसेच विमानतळ प्रशासनाने ही परवानगी नाकारत विमान जयपूरच्या विमानतळावर उतरवण्याची सूचना केली. वैमानिकाने विमान जयपूरला उतरवण्याचा नकार देत भारताची हवाई हद्द सोडली आहे. सध्या हे विमान चीनच्या दिशेने जात आहे.