पळसदरी ते खोपोली रेल्वे स्थानकांवर पन्नास सीसी टीव्ही कॅमेरे

कर्जत | प्रतिनिधी |
कर्जत ते खोपोली दरम्यानच्या रेल्वे स्थानकांवर 50 सी सी टिव्ही कॅमेरे बसविण्यात येणार असल्याचा निर्णय मध्य रेल्वे प्रशासनाने घेतला आहे. यासाठी सामाजिक कार्यकर्ते पंकज मांगीलाल ओसवाल यांनी पाठपुरावा होता.
रेल्वे स्थानकांवर एखादी घटना घडली की सी सी टीव्ही कॅमेर्‍याचे फुटेज घेऊन पोलीस यंत्रणा त्याचा तपास करीत असते. मात्र कर्जत ते खोपोली दरम्यानच्या पळसदरी, केळवली, डोलवली, लौजी आणि खोपोली या स्थानकांवर सी सी टिव्ही कॅमेरे नसल्याने एखाद्या घटनेचा तपास करताना पोलिसांना अडचण येते. याबाबत कर्जत रेल्वे पोलीस ठाण्याचे पोलीस निरीक्षक संभाजी यादव यांनी सामाजिक कार्यकर्ते पंकज ओसवाल यांच्याशी चर्चा केली होती.
या बाबीचे गांभीर्य लक्षात घेऊन ओसवाल यांनी मध्य रेल्वे प्रशासनाकडे पाठपुरावा केला. थोड्याच दिवसात त्यांच्या प्रयत्नांना यश आले आहे. मध्य रेल्वे प्रशासनाने कर्जत ते खोपोली दरम्यानच्या रेल्वे स्थानकांच्या सर्व्हे केला आणि लवकरच पळसदरी रेल्वे स्थानकावर सात, रेल्वे स्थानकावर तीन, डोलवली रेल्वे स्थानकावर चार, लौजी रेल्वे स्थानकावर तीन आणि खोपोली रेल्वे स्थानकावर 32 सी सी टीव्ही कॅमेरे बसविण्यात येणार असून कर्जत रेल्वे स्थानकावर 38 सी सी टीव्ही कॅमेरे बसविण्यात आल्याचे लेखी स्वरूपात कळविले आहे.

मध्य रेल्वे प्रशासनाने जरी कर्जत – खोपोली दरम्यानच्या रेल्वे स्थानकांवर सी टीव्ही कॅमेरे लवकरच बसविणार असल्याचे कळविले आहे. असे असले तरी ते कॅमेरे बसवेपर्यंत मी पाठपुरावा सुरू ठेवणार आहे.
पंकज ओसवाल, सामाजिक कार्यकर्ते