| छत्रपती संभाजीनगर | प्रतिनिधी |
छत्रपती संभाजीनगर लोकसभा मतदारसंघामध्ये राष्ट्रवादीचे ग्रामीण जिल्हाध्यक्ष मनोज घोडके यांनी लोकसभेसाठी अपक्ष उमेदवारी अर्ज दाखल. छत्रपती संभाजीनगरमध्ये राष्ट्रवादीत मोठी फूट पडल्याचं समोर आलं आहे. राष्ट्रवादीचे ग्रामीण जिल्हाध्यक्ष मनोज घोडके यांनी अपक्ष उमेदवारी अर्ज दाखल केला आहे. अर्ज मागे घेणार नसून पूर्ण ताकतीने निवडणूक लढू आणि ओबीसी समाजाचा एक खासदार संसदेत पाठवू अशी प्रतिक्रिया त्यांनी दिली आहे. छगन भुजबळ यांनी आयुष्यभर दुसर्यांना तिकीटं देण्याचं काम केलं मात्र त्यांना तिकीट मिळत नाही. महायुतीला ओबीसीच्या मतांची गरज नसल्यामुळे आमचा प्रतिनिधी असावा म्हणून अर्ज दाखल केल्याचं घोडके यांनी यावेळी बोलताना सांगितलं. घोडके हे राष्ट्रवादीचे ग्रामीण जिल्हाध्यक्ष आहेत, सोबतच ते समता परिषदेचे जिल्हाध्यक्ष देखील आहेत. भुजबळ यांचे कट्टर समर्थक अशी त्यांची ओळख आहे. घोडके यांचा उमेदवारी अर्ज कायम राहिल्यास छत्रपती संभाजीनगर लोकसभा मतदारसंघात ओबीसी मतांमध्ये मोठी फूट पडू शकते, त्याचा फटका हा महायुतीच्या उमेदवाराला बसण्याची शक्यता आहे.
छत्रपती संभाजीनगरमध्ये महाविकास आघाडीच्या वतीनं शिवसेना ठाकरे गटाचे नेते चंद्रकांत खैरे यांना उमेदवारी देण्यात आली आहे. तर महायुतीकडून शिवसेनेचे नेते संदीपान भुमरे निवडणुकीच्या रिंगणात आहेत. मात्र आता राष्ट्रवादीचे ग्रामीण जिल्हाध्यक्ष मनोज घोडके यांनी अपक्ष उमेदवारी अर्ज दाखल केल्यानं या मतदारसंघात मोठं ट्विस्ट निर्माण झालं आहे. याचा मोठा फटका हा महायुतीचा बसण्याची शक्यता आहे.