हायड्रोजन गळतीची आपत्ती टळली

। रसायनी । वार्ताहर ।

वसई-विरार महामार्गावर हायड्रोजन सिलेंडर वाहून नेणार्‍या वाहनाला अपघात झाला होता. हायड्रोजनचा हवेशी संपर्क येऊन रासायनिक प्रक्रिया झाल्यानंतर आग लागण्याची शक्यता गृहीत धरून महामार्ग वाहतूक पोलीस यंत्रणा, फायर ब्रिगेड टीम त्या ठिकाणी दाखल झाल्या होत्या. धनंजय गीध यांच्या रेस्क्यू ऑपरेशनमुळे महामार्गावरील होणारी आपत्ती टळली. परिस्थिती नियंत्रणात रहावी. या दृष्टिकोनातून कोणकोणत्या उपाययोजना कराव्यात, या संबंधात धनंजय गीध यांनी तेथील यंत्रणांना सूचना दिल्या. रसायनी येथून विरारकडे जात असताना भिवंडी दरम्यान वाहतूक कोंडी झाली होती.

अपघातामुळे दोन्ही बाजूसही वाहनांच्या रांगा लागल्याचे समजल्यावर धनंजय गीध यांनी अपघाताच्या ठिकाणी पोहोचण्यास दिरंगाई होणार हे लक्षात घेऊन सहाय्यक पोलीस निरीक्षक विठ्ठल चिंतामणी यांच्याशी संपर्क साधून अभिजीत जाधव यांच्या बाईकवर बसून भरारी पथकापर्यंत पोहोचले. नंतर भरारी पथकातील पोलिसांच्या मोटासायकलवरुन घटनास्थळ गाठले. अपघाताच्या ठिकाणाचे प्रत्यक्ष परीक्षण केले असता धनंजय गीध यांना वाहनातून पडून विखुरल्या गेलेल्या सिलिंडरमधील काही सिलिंडरना गळती लागलेली आढळली आणि त्यातील दोन सिलिंडरनी पेटदेखील घेतला होता. परिस्थिती अत्यंत भयानक आणि गंभीर होती. कोणत्याही क्षणी भडका उडण्याची शक्यता होती. मात्र पूर्वानुभवावरून स्वतःचा जीव धोक्यात घालून रसायनीतील मोहोपाडा येथील धनंजय गीध यांनी सर्व सुरक्षा यंत्रणांना सोबत घेत अत्यंत काळजीपूर्वकरीत्या परिस्थिती हाताळली.

जवळपास 12 तासाच्या अथक प्रयत्नानंतर परिस्थिती पूर्वपदावर आणण्यामध्ये त्यांना यश आले. त्यादरम्यान त्यांनी एकेरी वाहतूक सुरू ठेवण्यासाठी यशस्वी प्रयत्न केले होते. त्यामुळे महामार्ग वाहतूक पोलीस यंत्रणेवर पडलेला ताण काही प्रमाणात कमी झाला होता. अपघात घडल्यानंतर जवळपास 12 ते 15 तास आजूबाजूच्या परिसरातले लोक आणि प्रशासकीय यंत्रणा जीव मुठीत धरून होती. परिस्थिती पूर्वपदावर आल्यानंतर सर्वांनी मोकळा श्‍वास घेतला.
सहाय्यक पोलीस निरीक्षक विठ्ठल चिंतामणी यांनी अपघातग्रस्तांच्या मदतीसाठी सामाजिक संस्थेच्या गुरूनाथ साठेलकर, धनंजय गीध आणि सहकार्‍यांनी तत्परतेने घटनास्थळी येऊन केलेल्या सहकार्यासाठी आभार मानले आहेत. या रेस्क्यू ऑपरेशनवरून परतत असताना आपण एका मोठ्या आपत्तीवर मात केल्याचे समाधान सर्वांच्या चेहर्‍यावर दिसून आले.