खालापूर येथील रासायनिक कंपनीला भीषण आग

| खोपोली | प्रतिनिधी |

खालापूर तालुक्यातील नारंगी येथील एचपी इंटरनॅशनल या केमिकल कंपनीमध्ये शनिवारी (दि. 17) संध्याकाळी साडे सात वाजण्याच्या सुमारास भीषण आग लागली. या आगीत कंपनीचे मोठे नुकसान झाले आहे. आगीच्या भडकलेल्या ज्वाला दुरवरुन दिसत होत्या. आगीबरोबरच स्फोटांचे आवाजही येत असल्याने नागरिकांत भीतीचे वातावरण निर्माण झाले होते. दरम्यान,आगीचे नेमके कारण अद्याप समजलेले नाही.

खालापूर तालुक्यातील नारंगी व डोणवत गावाजवळच्या एचपी इंटरनॅशनल कंपनीत सायंकाळच्या दरम्यान एसीमध्येशॉर्टसर्किट झाल्याने आग लागली. ज्वालाग्राही पदार्थ असल्याने आगीचा भडका वाढतच गेल्याने कंपनीतील उत्पादन प्रक्रिया करणारा विभाग पूणपणे आगीत खाक झाला आहे. स्थानिक ग्रामपंचायत सदस्य निनाद गायकवाड यांच्या सूचनेनुसार नारंगी येथील लहान वाडी येथील आदिवासी कुटुंबाना सुरक्षित ठिकाणी हलविण्याची व्यवस्था करण्यात आली होती. खालापूर पोलीस, हेल्प फॉउंडेशन चे बचाव पथक, जवळच्या परिसरातील कंपन्यांचे अग्निशमन दलाचे पथक आग विझविण्यासाठी अथक प्रयत्न केले. पनवेल येथील बालाजी फॉर्मेलिन प्रायव्हेट लिमिटेड या कंपनीमधून आग विझविण्यासाठी फोमची व्यवस्था करण्याच्या सूचना तहसीलदार अभय चव्हाण यांनी दिल्या होत्या. सदर ठिकाणी असलेल्या व्यक्तींसाठी अल्पोपहार आणि पाण्याची सोय तहसील कार्यालयाकडून करण्यात आली होती. तहसीलदार अभय चव्हाण खालापूर यांच्या सुचनेनुसार मंडळ अधिकारी सचिन वाघ यांनी नारंगी आदिवासी बांधवांना पाणी, बिस्कीट वाटप केले. या ठिकाणी आलाना अग्निशमन दल, रिलायन्स अग्निशमन दल, टाटा स्टील अग्निशमन दल, ⁠ए एम / एन एस स्टील अग्निशमन दल, पेण नगर परिषद, गोदरेज कंपनी अग्निशमन दल, खोपोली अग्निशमन विभागाचे पथक तैनात करण्यात आले होते.