कर्जत तालुक्यात पर्यटनाला नवी झेप!

पाली-भूतिवली धरणात जेटस्की बोट क्लब सुरू

| नेरळ | वार्ताहर |

कर्जत तालुक्यातील पाली येथील भूतिवली धरण परिसरात ‘माथेरान व्हॅली जेटस्की क्लब’ या माध्यमातून जल पर्यटनाचा नवा उपक्रम सुरू करण्यात आला आहे. तालुक्यातील पर्यटनाला चालना देण्यासाठी हा निर्णय अत्यंत महत्त्वपूर्ण ठरणार आहे. या प्रकल्पाच्या माध्यमातून स्थानिक पातळीवर रोजगाराच्या नवीन संधी निर्माण होणार असून पर्यटकांना साहसी अनुभवाचा नवा ठेवा येथे मिळणार आहे.

दरम्यान, या उपक्रमासाठी धरण परिसराचा ठेका एका खासगी कंपनीला देण्यात आला असून, प्रशासनाला या बदल्यात वार्षिक मोबदला मिळणार आहे. सुरुवातीला काही बाधित शेतकऱ्यांनी या प्रकल्पाला विरोध दर्शविला होता, मात्र न्यायालयीन लढाईनंतर अखेर न्यायालयाकडून याला हिरवा कंदील मिळाला आहे.
कर्जत तालुका हा निसर्गसौंदर्याने नटलेला असल्याने पर्यटन दृष्ट्या मोठ्या प्रमाणावर विकसित होण्याची क्षमता यात आहे. भिवपुरी येथील लघुपाटबंधारे विभागाच्या देखरेखी खाली असणारे पाली भूतिवली धरणात जेटस्की बोट क्लबमुळे आता पर्यटकांना साहसी जलक्रीडांचा आनंद घेता येणार आहे. केवळ मुंबई-पुणे शहराच्या हाकेच्या अंतरावर एक दिवसीय तुमची ही ट्रिप डोळ्यात साठून ठेवणारी ठरणार आहे. त्यामुळे दूर समुद्रकिनाऱ्यांवर जाण्याची गरज उरणार नाही.
या उपक्रमाचे उद्घाटन दसऱ्याच्या शुभमुहूर्तावर करण्यात आले. या प्रसंगी लियाकत हुसेन सय्यद, नितीन कंदलगावकर, अय्यूब तांबोळी, राहुल जाधव, ॲड. सुमित साबळे, ॲड. गणेश कोहळी, तहसिन हुसेन सय्यद, मुबा नजे, झैद नजे, योगेश परदेशी, जावेद शेख, तौसीफ मुल्ला, सलीम कुरेशी आदी मान्यवर उपस्थित होते.

पहिल्याच दिवशी नागरिकांनी या जेटस्की राईडचा मोफत आनंद घेत परिसराला जल्लोषमय बनवले. मात्र, पुढील दिवसांत पर्यटकांना या रोमांचक अनुभवासाठी निश्चित शुल्क अदा करावे लागणार आहे. चारही बाजूला उंच कातळ कडा सह्याद्री उभा डोंगर असून मान्सून काळात हिरवीगार वनराई त्यातच मध्ये पाणी यामुळे या नवीन पर्यटन उपक्रमामुळे मुंबई पुणे परिसरासह देशांतर्गत तसेच आंतरराष्ट्रीय पर्यटकांचीही वर्दळ वाढेल, अशी अपेक्षा व्यक्त होत आहे.