बंगळूरूची हैद्राबादवर मात; 16व्या षटकात रचला इतिहास
| बंगळूरू | वृत्तसंस्था |
आयपीएलच्या पहिल्याच सामन्यात गतविजेत्या रॉयल चॅलेंजर्स बंगळुरूने सनरायझर्स हैदराबादवर मात करत आपणच चॅम्पियन असल्याच्या थाटात खेळ केला. त्यांनी 6 गडी राखून विजय मिळवत 19व्या हंगामाची दिमाखात सुरुवात केली. आरसीबीच्या या विजयात विराट कोहलीने सिंहाचा वाटा उचलला. आपल्या नावाला साजेसा असा एक जबरदस्त आणि दमदार खेळ त्याने सादर केला. तसेच, आरसीबीने केवळ 16 व्या षटकातच 200 हून अधिक धावांचे लक्ष्य गाठून इतिहास रचला आहे.
या सामन्यातील पहिल्या डावात बरेच कलाटणी देणारे क्षण ठरले. बंगळूरू संघातील जोश हेझलवूडच्या जागी संधी मिळालेल्या जेकब डफीने 3 बळी घेत हैदराबादची अवस्था 3 बाद 29 अशी दयनीय केली. पॉवर प्लेमध्ये हैद्राबादला 3 बाद 49 धावाच करता आल्या. मात्र, कर्णधार इशान किशन व हेनरिच क्लासन या दोघांनी हैद्राबादच्या हातून सामना खेचून नेला. या दोघांनी 53 चेंडूंत 97 धावांची भागीदारी करून हैदराबादला पुनरागमन करून दिले. परंतु, रोमारिओ शेफर्डने 14व्या षटकात ही जोडी तोडली. त्यामुळे क्लासन 32 धावांवर माघारी परतला. यादरम्यान बंगळूरूच्या फिल सॉल्टने घेतलेला झेल वादग्रस्त ठरला. त्यानंतर 16व्या षटकात इशानचा अविश्वसनीय झेल सॉल्टने टिपून सामन्याला पुन्हा कलाटणी दिली. इशान 38 चेंडूंत 8 चौकार व 5 षटकारांसह 80 धावांवर बाद झाला. त्यावेळी हैद्राबादच्या 155 धावा धावफलकावर होत्या. त्यामुळे ते जास्तीत जास्त 180 पर्यंत पोहोचतील असे वाटले होते. मात्र, अनिकेत वर्माने 18 चेंडूंत 43 धावा चोपून संघाला 9 बाद 201 धावांपर्यंत पोहोचवले. यावेळी बंगळूरूच्या डफी व रोमारिओ शेफर्ड यांनी प्रत्येकी 3 बळी टिपले. तर, भुवनेश्वर कुमार, अभिनंदन सिंग व सुयश शर्मा यांनी प्रत्येकी 1 बळी घेतला.
हैद्राबादने दिलेल्या लक्षाचा पाठलाग करताना आसीबीची सुरुवात काही खास झाली नाही. दुसऱ्याच षटकात फिल सॉल्ट (8) याचा झेल टिपण्यासाठी क्लासन व अनिकेत दोघेही पळाले. दोघांची टक्कर झाली, मात्र क्लासनने यशस्वी झेल टिपला. त्यानंतर मात्र इम्पॅक्ट प्लेअर म्हणून आलेल्या देवदत्त पडिक्कलचे वादळ घोंगवाले. त्याने 21 चेंडूंत आसीबीकडून हैद्राबाद विरूद्धचे दुसरे वेगवान अर्धशतक पूर्ण केले. यावेळी देवदत्त व विराट कोहली ही जोडी सामना जिंकून देईल असेच वाटले. परंतु, 45 चेंडूंत 101 धावांची ही भागीदारी 9व्या षटकात तुटली. देवदत्त 26 चेंडूंत 61 धावांवर माघारी परतला. कर्णधार रजत पाटीदारने 12 चेंडूंत 31 धावा चोपून विराटसह 22 चेंडूंत 53 धावा जोडल्या. डेव्हिड पायनेने सलग दुसऱ्या चेंडूवर जितेश शर्माला बाद करून आरसीबीवर दडपण आणण्याचा प्रयत्न केला. दरम्यान, विराटने 33 चेंडूंत अर्धशतक पूर्ण केले आणि आरसीबीने 6 गडी राखून हा सामना जिंकला.