मुंबई-गोवा महामार्गावर अपघातांची मालिका सुरूच

वाकण पुलानजीक अपघात, एक गंभीर जखमी

| सुकेळी | वार्ताहर |

मुंबई-गोवा महामार्गावर अपघातांची मालिका सुरूच असताना शुक्रवार (दि.27) सायं. 6.15 वाजण्याच्या सुमारास महामार्गावरील वाकण पुलानजीक ओव्हरटेक करत असताना, दोन ट्रकमध्ये समोरासमोर धडक बसून झालेल्या अपघातात एक जण गंभीररित्या जखमी झाला. त्याला तातडीने उपचारासाठी नागोठणे येथील सरकारी रुग्णालयात दाखल करण्यात आले.

याबाबतीत उपलब्ध झालेल्या माहितीनुसार महाड बाजूकडुन मुंबईकडे जात असलेला जी.जे. 06 ये.एक्स. 0371 या ट्रकला आयचर टेम्पो क्र. एम.एच.43 बी.पी. 0615 हा ओव्हरटेक करत असताना मुंबई महाडच्या दिशेने जाणारा डंपर क्र. एम.एच.06 बीडब्ल्यू 2184 या गाडीला टेम्पोंची समोरासमोर धडक बसून, तसेच ट्रकची टेम्पोला मागच्या बाजूस धडक बसून हा भीषण अपघात घडला. या अपघातात टेम्पो चालक कुमार मित्रे (45) रा. विक्रोली, मुंबई याच्या पायाला गंभीर स्वरुपाची दुखापत झाली असून, त्यास नागोठणे येथील सरकारी रुग्णालयात दाखल करण्यात आले. या अपघाताचा पुढील तपास नागोठणे पोलीस ठाण्याचे पोलीस निरीक्षक राजन जगताप यांच्या मार्गदर्शनाखाली सुरु आहे.