धक्कादायक! शेतात आढळले तीन महिन्यांचे मृत अर्भक

। कोल्हापूर । प्रतिनिधी ।

कोल्हापूर जिल्ह्यातील हातकणंगले तालुक्यातून एक धक्कादायक प्रकार समोर आला आहे. एका ऊसाच्या शेतात अंदाजे तीन महिन्यांचे अर्भक मृतावस्थेत पुरलेल्या स्थितीत आढळून आले. या घटनेने एकच खळबळ उडाली आहे. याप्रकरणी हुपरी पोलिसांकडून गुन्हा नोंद करण्यात आला असून अर्भक कोणाचे आहे याचा शोध पोलीस घेत आहेत.

तळंदगे (ता. हातकणंगले) येथील धोंडीराम नानासो फडतरे हे शेतात गुरुवारी (दि. 07) सकाळी नऊच्या सुमारास गेले होते. शेतातील माती उकरलेली दिसल्याने त्यांना संशय आला. त्यांनी मुलगा विनोद फडतारे यांना याबाबत कल्पना दिली. विनोदला घटनेबाबत संशयास्पद प्रकार वाटताच पोलीस पाटील समीर मुल्लानी यांना माहिती दिली. पोलिस पाटलांनी हुपरी पोलिसांना माहिती देताच अधिकारी व कर्मचारी घटनास्थळी दाखल झाले. पोलिसांनी घटनास्थळी पुन्हा खोदकाम केले असता मृतावस्थेत अर्भक आढळून आले. घटनास्थळी हँडग्लोव्हज, मीठ व रक्त लागलेल्या पिशव्या व इतर संशयास्पद वस्तू आढळून आल्याने हे प्रकरण अधिकच गंभीर असल्याचे दिसून आले.

त्यांनतर इचलकंरजी विभागाचे डीवायएसपी विक्रांत गायकवाड, अप्पर तहसीलदार महेश खिलारे, पोलीस निरीक्षक एन. आर. चौखंडे यांनी घटनास्थळी भेट दिली. यावेळी फॉरेन्सिक लॅबच्या टीमला पाचारण करण्यात आले आणि घटनास्थळी पंचनामा करण्यात आला. अर्भकाचा मृत्यू नेमका कसा झाला, कोणी आणि का केला, याबाबत पोलिसांनी तपास सुरु केला आहे.