रायगडच्या पर्यटन विकासाला गती द्या- खा. छत्रपती संभाजीराजे भोसले

। रायगड । प्रतिनिधी ।

रायगड किल्ला व परिसर पर्यटन विकासाचे काम उत्तम दर्जाचे व जलदगतीने व्हावे यासाठी जिल्हा प्रशासनाने प्राधिकरणाशी समन्वय राखून काम करावे. राज्य सरकारने मंजूर झालेला निधी 100 टक्के खर्च होईल यासाठी योग्य नियोजन करावे. अशा सूचना रायगड किल्ला व परिसर विकास पर्यटन आराखडा प्राधिकरणाचे अध्यक्ष खासदार छत्रपती संभाजीराजे भोसले यांनी केले.

खासदार छत्रपती संभाजीराजे भोसले यांच्या अध्यक्षतेखाली कोकण भवन येथील आयुक्त कार्यालयाच्या मुख्य दालनात सोमवारी (दि. 9) रायगड किल्ला व परिसर विकास पर्यटन आराखडा प्राधिकरणाची आढावा बैठक झाली. त्यावेळी ते बोलत होते. रायगड किल्ला संवर्धन व किल्ल्याच्या आजूबाजूचा परिसर पर्यटनाच्या दृष्टीने विकसित करण्यासाठी राज्य सरकारकडून निधी मंजूर करण्यात आला आहे. या वेळी रायगड किल्ला व परिसर विकास पर्यटनाची कामे उत्तम दर्जाची आणि जलदगतीने होण्यासाठी उपसमिती स्थापन करण्याच्या सूचना आराखडा प्राधिकरणाचे अध्यक्ष खासदार छत्रपती संभाजीराजे यांनी संबंधितांना दिल्या. या बैठकीस कोकण विभागाचे महसूल आयुक्त डॉ. राजेश देशमुख, रायगड जिल्हाधिकारी किशन जावळे, उपआयुक्त (नियोजन) प्रमोद केंबावी, रायगड उपजिल्हाधिकारी डॉ. रवींद्र शेळके, महाडचे उपविभागीय अधिकारी ज्ञानोबा बानापुरे, रायगड पाणी संवर्धन विभागाचे अधीक्षक अभियंता संजय शिंदे, रोहाचे सहाय्यक वनसंरक्षक रोहित चोबे, पेण-रायगड विद्यूत विभागाचे कार्यकारी अभियंता संजिवनी कट्टी, तसेच प्राधिकरणाशी संबंधित अधिकारी व कर्मचारी उपस्थित होते.

शिवसृष्टी उभारणार
किल्ल्यांचा इतिहास जिवंत करून दाखविण्यासाठी आधुनिक तंत्रज्ञानाचा योग्य वापर करून शिवसृष्टी निर्माण करण्यात येणार असल्याबाबतचे सादरीकरण बैठकीत करण्यात आले. यात रायगड किल्ल्यावर प्राचीन वस्तूंचे संवर्धन, आधुनिक तंत्रज्ञानाचा वापर करून पर्यटकांना मनोरंजनासह गड-किल्ल्यांची माहिती उपलब्ध करून देण्यात येणार आहे. किल्ल्यावरील सर्व वस्तूंचे माहिती संग्रहण करण्यात येणार आहे.

जिजामाता वाड्याचे संवर्धन करणार
रायगड किल्ल्यावरील चित्त दरवाजा, नाना दरवाजा, खुबल्दा बुर्ज, महादरवाजा आदींचे संवर्धन व जीर्णोद्धार करणे, तसेच पर्यटक व शिवप्रेमींना रायगडावर पोहोचण्यासाठी मजबूत पायवाटा निर्माण करणे, स्वच्छतागृह, पिण्याचे पाणी आदी महत्त्वाच्या सोयी उपलब्ध करून देणे, जलसंवर्धन करणे या बाबींचा समावेश आहे. याशिवाय पाचाड येथील राजमाता जिजाऊ समाधी व जिजामाता वाडा यांच्या संवर्धन व जीर्णोद्धाराचे कार्य प्रस्तावित आहे.

पाण्यासाठी 30 वर्षांचे नियोजन
रायगड जलसंधारण विभागाद्वारे रायगड किल्ला, शिवसृष्टी आणि परिसरातील गावांसाठी भविष्यात 30 वर्षे पुरेल या दृष्टिकोनातून पाण्याचे नियोजन करण्यासाठी आराखडा तयार करण्यात आला आहे. त्या आराखड्याचे सादरीकरण यावेळी करण्यात आले.