पालघर-मनोर मार्गावर अपघात; महिलेचा मृत्यू

। पालघर । प्रतिनिधी ।

पालघर-मनोर मार्गावर शेलवली गावाच्या हद्दीत विचित्र अपघात घडला. बुलेट ट्रेन प्रकल्पामध्ये काम करणार्‍या भरधाव जीपने रिक्षासह दुचाकीला धडक दिली. या अपघातात एका महिलेचा मृत्यू झाला असून चार जण जखमी झाले आहेत.

हा अपघात पालघर-मनोर मार्गावर शेलवली गावाच्या हद्दीत रेमी कंपनीसमोर बुधवारी (दि. 05) सायंकाळी साडेसातच्या सुमारास घडला. घटनेतील मृत महिला उज्वला जाधव या परिचारिका असून बोईसर येथील एका रुग्णालयात त्या काम करत होत्या. सायंकाळी रिक्षातून त्या कामावरून घरी जात होत्या. त्याचवेळी बुलेट ट्रेन प्रकल्पामध्ये काम करणार्‍या भरधाव जीपने या रिक्षासह मोटारसायकलला जोराची धडक दिली. हा अपघात इतका भीषण होता की, या अपघातात रिक्षा व मोटरसायकलसह त्या जीपचाही चक्काचूर झाला. तसेच, यात उज्वला जाधव यांचा मृत्यू झाला, तर चार जण जखमी झाले आहेत. जखमींवर सध्या रुग्णालयात उपचार चालू आहेत. अपघातानंतर जीप चालक फरार झाला असून याप्रकरणी पोलीस पुढील तपास करीत आहेत.