सैन्य दलाच्या गाडीला अपघात; सांगलीतील सुपुत्राचा दुर्दैवी मृत्यू

एक जवान गंभीर जखमी

। जबलपूर । वृत्तसंस्था ।

जबलपूरहून बंगळूरूला जाणाऱ्या सैन्य दलाच्या गाडीचा भीषण अपघात झाला आहे. पाठीमागून आलेल्या एका खासगी टँकरने सैन्य दलाच्या गाडीला जोरदार धडक दिली. या अपघातात एका जवानाचा मृत्यू झाला आहे. तर एक गंभीर जखमी झाला आहे.

सांगली जिल्ह्यातील लोणारवाडी गावचे सुपुत्र आणि पॅरा कमांडोचे हवालदार पोपट भगवान खोत (34) यांचा या अपघातात मृत्यू झाला आहे. तर, त्यांचा एक सहकारी जवान गंभीर जखमी आहे. बुधवारी दुपारी बारा वाजण्याच्या सुमारास जबलपूर जवळ हा अपघात झाला. रुग्णालयात पोहचण्या अगोदर पोपट खोत यांची प्राणज्योत मालवली. पॅरा कमांडोचे हवालदार पोपट भगवान खोत यांच्या मृत्यूची वार्ता कळताच संपूर्ण कवठेमहांकाळ तालुक्यावर शोककळा पसरली आहे. अत्यंत हुशार आणि मनमिळावू असलेल्या पोपट यांनी प्रचंड मेहनतीच्या जोरावर भारतीय सैन्यात भरती होण्याचे स्वप्न पूर्ण केले होते. मृत पोपट खोत यांची परिसरात गुणवत्तेची प्रशंसा होत असे. मात्र, आता त्याच्या अपघाती जाण्याने सर्वत्र हळहळ व्यक्त करण्यात येत आहे.

शासकीय इतमामात होणार अंत्यसंस्कार
पोपट खोत यांचं पार्थिव त्यांच्या गावी लोणारवाडी येथे आणलं जात आहे. कर्त्यव्य बजावत असताना, पोपट खोत यांचा अपघाती मृत्यू झाला असून, त्यांच्या पार्थिवावर शासकीय इतमामात अंत्यसंस्कार केले जाणार आहेत. निधनाच्या बातमीने परिवारावर दु:खाचा डोंगर कोसळला आहे. मृत्यूची माहिती मिळताच आईचा आणि पत्नीचा आक्रोश हृदय पिळवटणार आक्रोश होता.