तीन दिवस, तीन रात्री गाव जाणार वेशीबाहेर
| सिंधुदुर्ग | प्रतिनिधी |
बहुचर्चित व समस्त आचरेवासियांना प्रतीक्षा लागून राहिलेली दर तीन ते पाच वर्षांनी होणारी संस्थान आचरेची गावपळण यावर्षी श्रीदेव रामेश्‍वरच्या हुकुमावरून 15 डिसेंबरला होत आहे. तीन दिवस, तीन रात्री चालणार्‍या या गावपळणीत संपूर्ण आचरेवासीय आपल्या कुत्रे, मांजर, गुरे-ढोरे, कोंबड्यांसह गाव वेशीबाहेर राहणार असल्याने साडेसात हजार लोकसंख्या असलेला आचरे गाव संपूर्ण निर्मनुष्य होणार आहे.
या गावपळणीत हिंदूबरोबर मुस्लिम, ख्रिश्‍चन आनंदाने सहभागी होत असल्याने आचरे गावची गावपळण वैशिष्ट्यपूर्ण ठरत आहे. डिसेंबर 2019 साली आचरे गावच्या गावपळणीनंतर यावर्षी गावपळणीचे वर्ष असल्याने मानकर्यांच्या उपस्थितीत श्री देव रामेश्‍वराला देव दीपावली दिवशी दुपारी कौल प्रसाद घेण्यात आला. श्री रामेश्‍वराच्या हुकुमावरून प्रथेप्रमाणे 15 डिसेंबरला संस्थानकालीन आचरेची गावपळण होणार आहे. याबाबतची माहिती देवस्थानचे वहिवाटदार संतोष मिराशी यांनी दिली. आचरेवासीय गावाच्या सीमेबाहेर कारिवणे नदीकिनारी, चिंदर, त्रिंबक, पोयरे, मुणगे, आडबंदर, वायंगणी, सडेवाडी या भागात ग्रामस्थ राहुट्या उभारून राहणार आहेत. यात सर्वधर्मीय सहभागी होत असल्याने आचरेची गावपळण वैशिष्ट्यपूर्ण ठरत आहे. आजच्या विस्कळीत जीवनशैलीत गावपळणीनिमित्त तीन दिवस तीन रात्री संपूर्ण आचरे गाव वेशीबाहेर एकत्र नांदणार आहे. आजच्या विज्ञान युगातही ही प्रथा ग्रामस्थ मोठ्या हौशीने शेकडो वर्षे पाळत आली आहेत. तीन दिवस कोणतेही काम नसल्याने संपूर्ण दिवस आनंदात हसत खेळत संगीत, भजने यात आचरे गावची रयत तीन दिवस, तीन रात्री रममाण झाल्याचे दृश्य दिसणार आहे.