वीज चोरी प्रकरणी पाच जणांवर कारवाई

। मुरुड जंजिरा । वार्ताहर ।
वीज बिल जास्त येऊ नये म्हणून लोक विविध क्लुप्त्या वापरून वीज मीटर मध्ये हेराफेरी करीत असतात. हे कुठेतरी थांबायला पाहिजे या करिता वीज वितरण कंपनीच्या वतीने भरारी पथकांची नेमणूक करण्यात आली आहे. त्या अनुषंगाने मुरुड तालुक्यात कल्याण व पेणच्या भरारी पथकांनी धडक मोहीम हाती घेऊन मुरुड शहरासह तालुक्यात विविध ठिकाणी वीज चोरी केल्याप्रकरणी कारवाई करण्यात आली आहे.

भरारी पथक फिरत असताना काही ठिकाणी घरगुती वीज मीटरमध्ये फेरफार करत वीज चोरी केल्याचे वीज महावितरण कंपनीच्या कल्याणच्या भरारी पथकास निदर्शनास आल्याने याप्रकरणी दोन जणांवर कारवाई करण्यात आली तर घरगुती वीज मीटर वरुन व्यावसायिक करिता वापरत असल्याच्या पेणच्या भरारी पथकांना आढळून आल्याने या तीन जणांवर कारवाई करण्यात आली. वीज चोरी प्रकरणी पाच जणांवर कारवाई करण्यात येणार आहे असे मुरुड महावितरणचे उपमुख्य कार्यकारी अभियंता महादेव दातीर यांनी सांगितले.
मुरुड महावितरणचे उप मुख्य कार्यकारी अभियंता महादेव दातीर यांच्या कडून लोकांना आव्हान करण्यात आले आहे कि, कृपया वीज चोरी करू नका मीटरमध्ये हेराफेरी करू नये आलेले बिल प्रामाणिक स्वीकारून त्याचा भरणा करून महावितरणला सहकार्य करण्याचे आवाहन करण्यात आले आहे. मोठ्या प्रमाणात भरारी पथकांनी तालुक्यात वीज चोरी पकडून महावितरणने मोठा दंड वसूल केला आहे.