महाविस्तार ॲपचा लाभ घेण्याचे आवाहन

| अलिबाग | प्रतिनिधी |

शासनाच्या कृषी विभागामार्फत शेतकऱ्यांसाठी ‌‘महाविस्तार ॲप’ सुरू करण्यात आला आहे. या ॲपचे ‌‘शेतकऱ्यांचा डिजिटल मित्र’ असे वर्णन केले जाते. त्यामुळे शेतकरी बांधवांना आता या एका ॲपमध्येच शेती विषयक योजनाविषयी सर्व माहिती उपलब्ध होणार आहे. या ॲपच्या माध्यमातून शेतकऱ्यांना हवामान विषयक माहिती, पीक सल्ला, पिकासाठी लागणारी खताची मात्रा, कीड व रोगाविषयी माहिती तसेच पिकविलेल्या मालाचा बाजारभावही बघता येणार आहे, अशी माहिती जिल्हा अधीक्षक कृषी अधिकारी वंदना शिंदे यांनी दिली आहे.

तसेच, एका क्लिकवर शेतीसाठी लागणारी यंत्र अवजारे भाडेतत्त्वावर मिळविण्याकरिता त्यांच्या गावाच्या जवळपास असणाऱ्या अवजारे बँकांची माहिती देखील या ॲपवर उपलब्ध करून देण्यात आलेली आहे. नानाजी देशमुख कृषी संजीवनी प्रकल्प व महाडीबीटीवर असणाऱ्या सर्व योजनांची सविस्तर माहिती अर्थात त्यातील विविध घटकाकरिता अर्ज कसा करावा, आवश्यक कागदपत्रे या सर्वांची माहिती या ॲपमध्ये समाविष्ट आहे. ऑनलाईन शेती शाळा नवनवीन तंत्रज्ञानाचे व्हिडिओ देखील या ॲपच्या माध्यमातून शेतकरी बंधू बघू शकतात. याकरिता शेतकरी बांधवांनी प्ले स्टोअरवरुन ‌‘महाविस्तार ॲप’ डाऊनलोड करुन घ्यावा. त्यानंतर आपल्या शेतकरी आयडीने लॉगईन करुन आपले नाव, गाव, तालुका प्रविष्ठ करायचा आहे. ॲपच्या होम पेजवर शेतकऱ्यांना सर्व माहिती उपलब्ध होईल. याचा जास्तीत जास्त शेतकरी बांधवांनी लाभ घ्यावा, असे आवाहन जिल्हा अधीक्षक कृषी अधिकारी वंदना शिंदे यांनी केले आहे.