सेंट जोसेफ कॉन्व्हेंट स्कूलची मनमानी

पूर्वसूचना न देता शिक्षकांना काढले

| पाताळगंगा | प्रतिनिधी |

खालापूर तालुक्यातील लोधीवली येथील सेंट जोसेफ कॉन्व्हेंट स्कूलमध्ये गेली तीन वर्षे सेवा देणाऱ्या पाच शिक्षकांना कोणतीही पूर्वसूचना, लेखी नोटीस किंवा चौकशी न करता सेवेतून कमी केल्याचा आरोप शिक्षकांनी केला आहे. 4 फेब्रुवारी रोजी मुख्याध्यापिका व शाळा व्यवस्थापन समितीने हा निर्णय घेतल्याचे शिक्षकांचे म्हणणे आहे. या घटनेमुळे स्थानिक शैक्षणिक वर्तुळात नाराजी व्यक्त होत आहे.

शिक्षकांच्या म्हणण्यानुसार, रुजू झाल्यापासून त्यांना सातत्याने मानसिक त्रास दिला जात होता. ‌‘मराठी शिक्षक नको’ अशा भूमिकेतून जाणीवपूर्वक कमी लेखणे, कोणतीही अधिकृत कागदपत्रे न देणे आणि आता अचानक सेवेतून कमी करणे हा अन्याय असल्याचे त्यांनी सांगितले. तीन वर्षे प्रामाणिकपणे सेवा बजावूनही अशी वागणूक मिळाल्याने शिक्षकांनी तीव्र नाराजी व्यक्त केली आहे. दरम्यान, मुख्याध्यापकांनी शिक्षकांना ‌‘दोन महिने शाळेला सेवा द्या, त्यानंतर दुसरी नोकरी शोधा’ असे सांगितल्याचा दावा शिक्षकांनी केला आहे. तसेच पीएफची रक्कमही जमा करण्यात आलेली नसल्याचा आरोप त्यांनी केला आहे. या सर्व आरोप-प्रत्यारोपांमुळे प्रकरणाची अधिकृत चौकशी होण्याची मागणी सर्व स्तरातून होत आहे.

हे प्रकरण जिल्हा शिक्षण अधिकारी (माध्यमिक) यांच्या कार्यक्षेत्रात येते. संबंधितांनी लेखी तक्रार करावी. विद्यार्थ्यांच्या शैक्षणिक अडचणी असल्यास सखोल माहिती घेऊन तातडीने कारवाई करण्यात येईल.

-दीपा परब,
गटशिक्षणाधिकारी खालापूर

रुजू झाल्यापासून मुख्याध्यापक आणि व्यवस्थापनाकडून मानसिक त्रास दिला जात आहे. शाळा ख्रिश्चन समाजाची असल्यामुळे त्याच समाजातील शिक्षकांची भरती करण्याचा प्रयत्न सुरू असल्याची माहिती आम्हाला मिळाली. आमचे पीएफही भरलेले नाही. आता दोन महिन्यांनंतर नोकरी सोडण्यास सांगितले जात आहे.

-पीडित शिक्षक

शिक्षकांची नियुक्ती कॉन्ट्रॅक्ट पद्धतीने केली जाते. ती कायमस्वरूपी नसते. तीन वर्षांनंतर त्यांना दुसरी नोकरी शोधण्यास सांगितले जाते. हा निर्णय शाळा व्यवस्थापन समितीचा असतो.

-सिसिल्यम्मा सेबॅस्टियन,
मुख्याध्यापिका