बापरे! मापगांव-मुशेत येथे सशस्त्र दरोडा

पात्रे कुटुंबियांना मारहाण करून दरोडेखोर पसार; 20 लाखांचा ऐवज लुटला

। रायगड । प्रतिनिधी ।

रायगड जिल्ह्यातील अलिबाग तालुक्यात मापगाव-मुशेत परिसरात शनिवारी (दि.3) मध्यरात्री थरारक आणि अंगावर काटा आणणारा सशस्त्रदरोडा पडल्याने संपूर्ण परिसर हादरून गेला आहे. कुक्कुट खाद्यनिर्मिती कंपन्यांमध्ये अग्रेसर असलेल्या कुकूचकू कंपनीचे मालक दिलीप पाथरे यांच्या बंगल्यावर तब्बल नऊ सशस्त्र दरोडेखोरांनी फिल्मीस्टाईल दरोडा टाकत 20 लाख रुपयांचा ऐवज लुटला. दरोड्यादरम्यान कुटुंबियांवर पेट्रोल ओतून जाळण्याची धमकी देण्यात आली, तर चिमुकल्या आयानला हत्याराच्या धाकाने घराबाहेर नेऊन कुटुंबाला अक्षरशः मृत्यूच्या छायेत ठेवण्यात आले.

शनिवारी रात्री साडेबारा वाजण्याच्या सुमारास दरोडेखोरांनी बंगल्याच्या मागील बाजूस असलेल्या वॉल कंपाऊंडवरील तारेचे कुंपण तोडून प्रवेश केला. स्लायडिंग विंडो उघडून लोखंडी ग्रीलचे कुलूप आणि कडी कोयंडा तोडत त्यांनी घरात घुसखोरी केली. विशेष म्हणजे, बंगल्याच्या आवारात श्वान मोकळे असतानाही कोणताही आवाज न होता हा धाडसी दरोडा टाकण्यात आला. पाथरे यांच्या बंगल्यामध्ये सीसीटीव्ही कॅमेरे आहेत. परंतु, घराच्या मुख्यद्वारावरच हे कॅमेरे आहेत. आणि, तेदेखील बंद अवस्थेत आहेत. यामुळे दरोडेखारांचे फावले असल्याची चर्चा आहे.

घरात प्रवेश करताच दरोडेखोरांनी चिमुकल्या आयान पाथरेला शस्त्राचा धाक दाखवत बाहेर नेले आणि मोबाईलवरून घरातील साथीदारांशी संपर्क साधला. त्यानंतर मुख्य दरवाजा आतून बंद करून कटावणी अडकवण्यात आली. झोपेत असलेल्या कुणाल पाथरे व त्यांच्या पत्नी विनिता पाथरे यांना शस्त्रांच्या धाकात ठेवून त्यांच्या अंगावर पेट्रोल ओतण्यात आले. दरम्यान, कुणाल पाथरे यांनी विरोध करण्याचा प्रयत्न केला, मात्र दरोडेखोरांपुढे त्यांचे काही चालले नाही. उलट, दरोडेखोरांनी त्यांना मारहाण केली.

हळूहळू घरातील सर्व सदस्यांना शस्त्राचा धाक दाखवून उठवले. दिलीप पाथरे आणि त्यांच्या पत्नी माधवी यांनीदेखील दरोडेखोरांना प्रत्युत्तर केले; परंतु या झटापटीत माधवी पाथरे यांच्या हाताला चाकू लागून गंभीर जखम झाली, तर दिलीप पाथरेंनाही बेदम मारहाण करत त्यांच्या अंगावर पेट्रोल ओतण्यात आले. “तिजोरी, दागिने आणि पैसे त्वरित काढा, अन्यथा आयानला ठार मारू,” अशी अमानुष धमकी देत दरोडेखोरांनी संपूर्ण कुटुंबाला दोरीने हात-पाय बांधून ठेवले. घरातील सर्व मोबाईल जप्त करण्यात आल्याने मदतीची कोणतीही संधी उरली नव्हती.

हा सर्व प्रकार घरात असणारी पाथरे यांची नात ओवी पात्रे पाहात होती. तिला या दरोडेखोरांनी काहीच केले नसल्याचे किंवा घरातील कोणत्याही महिलेला काहीच केले नसल्याचे दहशतीमध्ये असणाऱ्या पाथरे कुटुंबियांनी सांगितले. आपला मुलगा दरोडेखोरांच्या ताब्यात आहे, हे कळताच त्याचा जीव वाचवण्यासाठी कुणाल पाथरे यांनी प्रसंगावधान राखून वडील दिलीप पाथरे यांना सांगून घरातील दागिने व रोख रक्कम असा सुमारे 20 लाखांचा ऐवज दरोडेखोरांच्या स्वाधीन करण्यास सांगितले. तरीही समाधान न झाल्याने दरोडेखोरांनी तळघर दाखवण्याची मागणी करत घरातील फोटो, साहित्याची तोडफोड करत सर्वत्र शहानिशा केली. मात्र, त्यांच्या हाती अधिक काही लागले नाही.

तब्बल एक तास सुरू असलेल्या या दहशतीनंतर दरोडेखोर चारचाकी वाहनाने पसार झाले. सीसीटीव्ही फुटेजमध्ये चारचाकी गाडी आणि मार्ग दाखवणारी दुचाकी स्पष्ट दिसत आहे. धक्कादायक बाब म्हणजे, पसार होताना दरोडेखोरांनी आयानला पुन्हा घरात सोडले आणि जखमी माधवी पाथरेंच्या हातावर पट्टी बांधल्याचेही कुटुंबियांनी सांगितले.

घटनेनंतर धैर्य एकवटत पाथरे कुटुंबियांनी अलिबाग पोलीस ठाण्याशी संपर्क साधला. तातडीने पोलीस पथक, फॉरेन्सिक टीम आणि पोलीस निरीक्षक किशोर साळे घटनास्थळी दाखल झाले. जिल्हा मुख्यालयापासून जवळ असणाऱ्या परिसरात दरोडा पडल्याने स्वतः जिल्हा पोलीस अधीक्षक आंचल दलाल यांनीही घटनास्थळी भेट देऊन कुटुंबियांना धीर दिला. तपासादरम्यान दरवाजाला अडकवलेली कटावणी सापडली असून, त्यावरील पांढऱ्या कागदावर इंग्रजीत ‌‘डीएआर‌’ असे शब्द लिहिलेले आढळले आहेत. सीसीटीव्ही फुटेज व वाहन क्रमांकाच्या आधारे तपासाला वेग देण्यात आला असून, काही संशयितांना पोलिसांनी ताब्यात घेतले आहे. या थरारक आणि धाडसी दरोड्यामुळे जिल्हा मुख्यालयाजवळील परिसरातही नागरिकांच्या सुरक्षिततेचा प्रश्न ऐरणीवर आला असून, पोलिसांसमोर मोठे आव्हान उभे राहिले आहे.

अलिबाग तालुक्यातील मापगाव-मुशेत येथे झालेल्या सशस्त्र दरोड्याचा तपास सुरू आहे. या गुन्ह्यात सहभागी असलेल्या काही आरोपींना ताब्यात घेतले असून, उर्वरित आरोपींचा शोध युद्धपातळीवर सुरू आहे. लवकरच हा गुन्हा उघड केला जाईल.

– आंचल दलाल, जिल्हा पोलीस अधीक्षक, रायगड