पनवेल बाजारात मातीच्या नागांची आवक

| खांदा कॉलनी | प्रतिनिधी |

श्रावण महिन्यातील पहिला सण असलेल्या नागपंचमीचा उत्साह नागरिकांमध्ये पाहायला मिळत आहे. नागपंचमीच्या पार्श्वभूमीवर रविवारी (दि.16) पनवेलच्या भाजी बाजारात मातीच्या नागांच्या मूर्ती विक्रीसाठी दाखल झाल्या. त्यामुळे नागपंचमीच्या पूजेसाठी लागणाऱ्या साहित्याचीही बाजारात मोठ्या प्रमाणावर खरेदी सुरू होती.

नागपंचमीच्या दिवशी पूजेसाठी जिवंत नाग पकडणे किंवा त्याचा वापर करणे टाळणे आवश्यक आहे. वन्यजीवांचे संरक्षण करण्यासाठी जिवंत नागाची पूजा करण्याऐवजी मातीच्या नागाची पूजा करण्याचे आवाहन करण्यात येते. नाग हा शेतकऱ्यांचा मित्र मानला जातो. शेतातील उंदीर तसेच अन्य पिकांना नुकसान करणाऱ्या प्राण्यांवर नियंत्रण ठेवण्यात नागाची महत्त्वाची भूमिका असते. त्यामुळे नागपंचमीच्या निमित्ताने सर्पसंवर्धनाचा संदेश देण्याची गरज व्यक्त होत आहे. नागांना पकडून त्यांची पूजा करण्यापेक्षा त्यांच्या नैसर्गिक अधिवासाचे संरक्षण करणे महत्त्वाचे आहे. मातीच्या नागांची पूजा करून परंपरा आणि पर्यावरण संवर्धनाचा समतोल साधता येतो. नागपंचमीच्या निमित्ताने नागरिकांनी वन्यजीवांविषयी संवेदनशीलता दाखवावी, असे आवाहन करण्यात येत आहे. त्यामुळे पनवेल बाजारपेठेत मातीच्या नागांसह पूजेच्या साहित्याची खरेदी करण्यासाठी नागरिकांची लगबग सुरू होती.